Arıqlamağı sürətləndirən yeni metod - ARAŞDIRMA

Cənubi Danimarka Universitetinin tədqiqatçıları qida qəbulu azaldıqda aktiv kalori yanmasını qorumağa kömək edə biləcək yeni mexanizm kəşf ediblər. 

Sfera.az xəbər verir ki, tədqiqat “Cell Metabolism” (CM) jurnalında dərc olunub.

Bildirilir ki, kaloriləri azaldaraq arıqlamağa çalışan bir çox insan plato effekti ilə qarşılaşır. Belə ki, əvvəlcə kilolar yox olur, lakin sonra bədən enerji sərfiyyatını azaldaraq maddələr mübadiləsini yavaşladır.  Arıqlamaq üçün dərmanlar qəbul edən şəxslərdə də eyni problem yaranır. Bədən çəkisinin 20-25%-i azaldıqdan sonra bu dərmanların təsiri zəifləyir.

Araşdırmanın aparıcı müəllifi Kim Ravnsyaer bildirib ki, ilk mərhələlərdə arıqlamaq yaxşı gedir, lakin sonra orqanizm uyğunlaşır və proses yavaşlayır.

Elm adamları Plvap geninin siçanlarda qaraciyər mübadiləsinə təsirini araşdırıb və gözlənilmədən onun əsas rolunu aşkar ediblər. Normalda bu gen qaraciyərin oruc zamanı şəkər yandırmaqdan yağ yandırmağa keçməsinə kömək edir. Ancaq Plvap dayandırılsa, qaraciyər aclıq siqnalını qəbul etməyi dayandırır və maddələr mübadiləsini sürətləndirən şəkəri aktiv şəkildə istehlak etməyə davam edir.

Məlum olub ki, Plvap olmadan qaraciyər orqanizmin qidalandığını “düşünməyə” davam edir və yüksək metabolik sürəti saxlayır. Bu zaman ehtiyatda olan yağ qaraciyərdə yerləşmir, əksinə əzələlərə yenidən paylanır, onların insulinə həssaslığını artırır. Plvaplı siçanlarda qan şəkərinin səviyyəsi aşağı olub ki, bu da diabetin müalicəsi üçün faydalı ola bilər.

Əgər Plvapı dayandırma effektini təqlid edən bir dərman hazırlana bilərsə, o, davamlı arıqlamağa imkan verə bilər.

Qeyd edilib ki, indiyə qədər tədqiqatlar yalnız siçanlar üzərində aparılıb, lakin nəticələr piylənmə və diabet üçün yeni müalicə üsulları üçün ümid verir.

Firuzə Əliyeva