Vitaminlər xəstəlik yaradır? - Həkimdən AÇIQLAMA

Qış mövsümündə insanlar immunitetlərini gücləndirmək, soyuqdəymə və qrip kimi xəstəliklərdən qorunmaq məqsədilə vitaminlərdən istifadəni artırırlar. Lakin reseptsiz və həkim nəzarəti olmadan  vitamin istifadəsi ciddi sağlamlıq problemlərinə yol açır.

Sfera.az xəbər verir ki, bunu Yenimahalle Təhsil və Araşdırma Xəstəxanası Daxili Xəstəliklər Klinikasının mütəxəssisi Emine Zeynep Taşkale bildirib:

"Vitaminlərin miqdarı hər fərd üçün fərqlidir. Yaşlı insanlar, hamilə qadınlar, xroniki xəstəliklərdən əziyyət çəkənlər və digər xüsusi hallarda bu miqdar dəyişə bilər.  
Vitamin əlavələri əvəzinə balanslı və düzgün pəhriz etmək daha faydalıdır. Vitaminlərin həddindən artıq qəbulu yorğunluq, ürəkbulanma, baş ağrısı və hətta qaraciyər zədələnməsinə, böyrək çatışmazlığına qədər ciddi yan təsirlərə yol aça bilər".

Həkim qeyd edib ki, bəzi vitaminlərin dərmanlarla birgə qəbulu ciddi problemlər yaradır:

"Həddindən artıq A vitamini qəbulu baş ağrısına, dəri qurumasına, saç tökülməsinə, qaraciyər zədələnməsinə və qadınlarda menstruasiya pozğunluğuna səbəb olur. Eyni zamanda, C vitamini böyrəklərdə daş əmələ gətirir. Vitaminlərdən istifadə üçün həkim nəzarəti vacibdir. Hər hansı bir vitamin əlavəsinə başlamazdan əvvəl müvafiq testlərdən keçmək, vitamin çatışmazlığını müəyyən etmək və fərdi dozada müalicə tətbiq etmək çox önəmlidir. Vitamin əlavələrini yalnız tövsiyə olunan dozada qəbul etmək lazımdır".

Ülkər Abdurahmanlı