Son illərdə "oğlanların qızlaşması", "kişilərin qadınlaşması" ifadəsi tez-tez işlənir. Bu həm cinsiyyətin sosial konstruksiyaları, həm də gənc oğlanların psixoloji və fiziki dəyişiklikləri ilə əlaqədar məsələdir. Cəmiyyət kişilərdən "sərt", "güclü" və "lider" olmalarını gözləsə də, onların çoxu bu düşüncəni artıq aşıb. Kişilərin qadın davranışları sərgiləməsi, emosional ifadələrini və həssas tərəflərini göstərməsi çoxları tərəfindən normal qəbul edilir.

Bəs nəyə görə kişilər qadın davranışları sərgiləyirlər?

Mövzu ilə bağlı Sfera.az-a danışan psixoloq Gülər Məmmədova bildirib ki, son dövrlər kişilərin qadın davranışları sərgiləməsi onların daha çox empatiya və əlaqə qurmaq istəməsindən qaynaqlanır:

"Emosional dərinlik, incəlik və qayğıkeşlik kimi xüsusiyyətlər yalnız qadınlara aid olmamalıdır. İndiki dövrdə kişilər də bu xüsusiyyətləri sərgiləyərək daha yaxın münasibətlər qurmağa çalışırlar.Hələ də bəzi cəmiyyətlərdə kişilərin qadın davranışlarını sərgiləməsi qəbul olunmur. Bu, çox zaman kişilərin zəif və qeyri-kamil göstərilməsinə gətirib çıxara bilər. Lakin bu yanaşma zamanla dəyişir.Estetik görünüşə olan maraq və özünə qayğı əvvəllər yalnız qadınlara xas davranışlar kimi qəbul edilirdisə, indi bu hallar kişilərdə də var. Bu, cəmiyyətin dəyişən gözləntiləri ilə sıx əlaqəlidir. Oğlanlar artıq saç modelləri, geyim və baxımlı olma mövzusunda daha seçici olurlar. Təsadüfi deyil ki, kosmetika, baxım və moda sahələrində də kişilər böyük bazar payına sahibdirlər".

Psixoloq qeyd edib ki, kişilərin bəzən qadın davranışları sərgiləməsi hormonlarla da əlaqəli ola bilir:

"Kişilərin bədənlərində baş verən fiziki dəyişikliklər çox vaxt hormonal dəyişikliklərlə bağlıdır. Məsələn, testosteron hormonunun səviyyəsi azaldıqca kişilərdə bəzi qadın xüsusiyyətləri, məsələn, bədən yağı nisbətinin artması və səsin incəlməsi kimi dəyişikliklər meydana gəlir. Bəzən bu, yaşla əlaqəli olaraq baş verən təbii dəyişikliklər ola bilər".

Ülkər Abdurahmanlı

Kişilərin "qadınlaşması" hormonal defektdir, yoxsa şəxsi seçim? - AÇIQLAMA