"Bu amillər qadınların doğuşdan sonra ölməsinə səbəb olur" - AÇIQLAMA

Son illərdə dünya üzrə anaların doğuşdan sonra ölümü ilə bağlı statistikalarda artım müşahidə olunmaqdadır.  Bu hallar öz ölkəmizdə də baş verir. 

Bəs doğuşdan sonra ananın ölümü nə ilə bağlıdır?

Mövzu ilə bağlı Sfera.az-a danışan ginekoloq Təranə Həsənova bildirib ki, anaların doğuşdan sonra ölümünün başlıca səbəbləri arasında qanaxma (hemorragiyalar), infeksiyalar, yüksək qan təzyiqi, ürək və damar problemləri və səhv tibbi müdaxilələr yer alır:

"Doğuşdan sonra həddindən artıq qan itirilməsi anaların ölümünə səbəb olan hallardan biridir. Bu vəziyyətin vaxtında müalicə edilməməsi və müdaxilə olunmaması ağır nəticələrə səbəb ola bilər. Bir digər əsas səbəb isə doğuşdan sonra yaranan infeksiyalardır. Əgər infeksiya vaxtında aşkarlanmazsa, ananın həyatı ciddi şəkildə təhlükəyə girər. Həm doğuş yolu infeksiyaları, həm də cərrahi müdaxilə nəticəsində yaranan infeksiyalar anaların ölümünə səbəb ola bilər. Bu cür vəziyyətlərin qarşısını almaq üçün doğumdan sonra doğru tibbi baxım göstərmək lazımdır". 

Həkim qeyd edib ki, sosial və iqtisadi amillər də anaların doğuşdan sonra ölüm hallarını artıra bilər:

"Tibbi xidmətlərə əlçatanlığın olmaması, keyfiyyətli səhiyyə xidmətlərinin əskikliyi və ya müalicə üçün lazımi avadanlıqların mövcud olmaması bu halların artmasına gətirib çıxarır".

Təranə Həsənova vurğuladı ki, anaların doğuşdan sonra ölməsinin qarşısını almaq üçün səhiyyə infrastrukturu təkmilləşdirilməlidir:

"İlk növbədə, bütün hamilə qadınlar üçün vaxtında tibbi müayinələr və təcrübəli həkimlər tərəfindən müntəzəm nəzarət həyata keçirilməlidir. 
Həm hamilə qadınlara, həm də onların ailələrinə hamiləlik dövlü ilə bağlı məlumat verilməlidir. Hər bir hamilə qadın tibbi müayinələdən vaxtında keçməli və əgər ananın səhhətində bir problem varsa, qarşısı tez bir zamanda alınmalıdır. Doğuşdan sonra anaların ölümünə qarşı mübarizənin gücləndirilməsi yalnız tibbi tədbirlərdən asılı deyil.  Bu halla mübarizə aparmaq üçün cəmiyyət və səhiyyə qurumları birgə çalışmalıdır".

Ülkər Abdurahmanlı