TƏBİB mediada adından yayılmış açıqlamanı TƏKZİB ETDİ: "Yetərli çarpayımız var"
Ötən gün Azərbaycanda pasiyentlərin xəstəxanalara qəbul edilməməsi ilə bağlı xəbərlər yayılıb. Qeyd olunur ki, xəstələr tibb müəssisələrində çarpayı olmaması səbəbilə geri göndərilir.
TƏBİB isə şikayətlə bağlı mediaya verdiyi açıqlamasında bildirib ki, son zamanlar tibb müəssisələrinə artan müraciət saylarının nəticəsidir ki, xəstəxanalarda doluluq faizi yüksəkdir:
"Çarpayıların doluluq səviyyəsi hər gün dəyişir. Bəzən boş çarpayı olmadığı üçün müraciət etmiş vətəndaşların TƏBİB tabeli başqa tibb müəssisələrinə yerləşdirilməsi mümkün olmur. Artım dinamikasını nəzərə alaraq yeni intensiv terapiya şöbələrinin yaradılması nəzərdən keçirilir”.
Bu açıqlamadan sonra vətəndaşlar arasında narahatlıq artıb.İddia olunur ki, xəstəxanalarda çarpayı tapılmamasının səbəbi son zamanlar yayılmış viruslarla bağlıdır və bu artıq həyəcan təbilidir.
Maraqlıdır, iddiaların nə dərəcədə doğruluq payı var?
Mövzu ilə bağlı Sfera.az-ın sorğusuna TƏBİB-dən cavab olaraq bildirildi ki, hazırda TƏBİB-in tabeliyində olan tibb müəssisələrindəki Yoluxucu xəstəliklər şöbələrində yetərli çarpayı ehtiyatı mövcuddur.
Qeyd edildi ki, qrip və digər respirator xəstəliklər, əsasən, ambulator şəraitdə müalicə olunur:
“Xəstəliyə yoluxan şəxslər ilkin səhiyyə xidməti həkimləri tərəfindən müşahidə olunur və müalicələrini evdə davam etdirirlər. Buna baxmayaraq, ağırlaşma halları olan zaman pasiyentlər tibb müəssisələrinə hospitalizasiya olunurlar. Məlumat üçün bildirək ki, Sabunçu Tibb Mərkəzinin Yoluxucu xəstəliklər şöbəsi və mərkəzin nəzdində olan Məhəmmədi Modul Tipli Xəstəxanasında yetərli çarpayı sayı mövcuddur”.
Firuzə Əliyeva
