Azərbaycanın xərçəngdən sönən ULDUZLARI... - ADLAR + FOTO
Xəbər verdiyimiz kimi, aktrisa Çimnaz Sultanova bağırsaq xərçəngindən dünyasını dəyişib. Mərhum bu gün dəfn ediləcək. Ümumiyyətlə, istər dünya, istərsə də yerli sənət adamlarının həyatına, yaradıcılığına son qoyan xəstəliklərdən biri məhz xərçəngdir. Çimnaz Sultanova kimi bu xəstəliyin qurbanı olan bir sıra tanınmış simalar var.
Sfera.az bu xəstəliklə mübarizə aparan, lakin dünyasını dəyişən məşhurların siyahısını təqdim edir:
Əməkdar artist Aygün Hümmətova (Bəylər) – O, Ankara şəhərində vəfat edib. Sənətçi uzun müddət, onkoloji xəstəlikdən müalicə olunub. Aygün Bəylər süd vəzi xərçəngindən dünyasını dəyişib.
Rəmiş (Rafiq Hüseynov) - Məşhur gitara ifaçısı, Xalq artisti Rəmiş uzun müddət xərçəng xəstəliyi ilə mübarizə aparıb. O, 2021-ci ilin aprelin 5-də vəfat edib.
Xərçəngin qurbanı olan məşhurlar sırasında “Toppuş bacı” kimi tanıdığımız aktrisa Tünzalə Əliyevanın adı da yer alır. O, 22 yanvar 2023-cü il tarixində uzun sürən xəstəlikdən sonra dünyasını dəyişib.
Vəfat edən digər məşhurlardan biri tanınmış aparıcı Natəvan Babayeva olub. Aparıcı da uzun müddət onkoloji xəstəlikdən əziyyət çəkib. Uzun illər ANS-də çalışmış jurnalist 20 iyul 2023-cü ildə vəfat edib.
Xalq artisti Ramiz Novruz uzun müddət mədə xərçəngi xəstəliyindən əziyyət çəkib. O, 20 fevral 2023-cü il tarixində 67 yaşında vəfat edib.
Azərbaycanın Xalq Artisti, tanınmış aktrisa Hökumə Qurbanova da xərçəng xəstəliyinə görə həyatını itirmiş sənətçilərdən biridir. O, 1988-ci ildə dünyasını dəyişib.
Tanınmış muğam ustadı Ağaxan Abdullayev də xərçəng xəstəliyindən əziyyət çəkib. O, 2018-ci ildə vəfat edib.
Əməkdar artist, Akademik Milli Dram Teatrının aktyoru Ələsgər Məmmədoğlu qaraciyər xərçəngindən əziyyət çəkib. Aktyor öldüyü günə qədər xərçəng xəstəsi olduğunu bilməyib. Bir müddət müalicə alan sənətkar 2015-ci il dekabrın 21-də 69 yaşında vəfat edib.
Xalq şairi Vaqif Səmədoğlu da bu xəstəliyə tutulanlar sırasında yer alır. Şair mədə xərçəngindən əziyyət çəkirdi. O, 2015-ci il yanvarın 28-i Bakıda dünyasını dəyişib. 29 yanvarda Birinci Fəxri xiyabanda dəfn olunub.
Xərçəng xəstəliyindən əziyyət çəkən daha bir məşhur sima Xalq artisti Rafiq Hüseynov olub. O, oktyabrın 26-da müalicə aldığı Almaniyada dünyasını dəyişib.
Azərbaycanın görkəmli teatr və kino aktyoru, Xalq artisti Fuad Poladov 4 may 2018-ci ildə 69 yaşında dünyasını dəyişib. O, uzun müddət xərçəng xəstəliyindən əziyyət çəkirdi. Məzarı "Qurd qapısı" qəbiristanlığındadır.
Səməd Vurğun ailəsinin digər üzvü, Vaqif Səmədoğlunun böyük qardaşı Yusif Səmədoğlu da xərçəng xəstəliyindən əziyyət çəkib. O, 1998-ci il avqustun 17-də 62 yaşında vəfat edib.
Azərbaycanın Əməkdar artisti Xanım Qafarova süd vəzi xərçəngindən əziyyət çəkib. O, 11 iyul 2014-cü ildə Bakıda dünyasını dəyişib. Elə həmin gün Kürdəxanı qəbiristanlığında dəfn olunub.
Günay
