Hazırda dünyada, o cümlədən ölkəmizdə bir sıra viruslar yayılıb. Bunlar qızdırma, ishal, başgicəllənmə və.s. kimi əlamətlərlə müşahidə olunur. Mütəxəssislər isə xüsusilə soyuq hava şəraitində virusların daha sürətlə yayıla biləcəyini vurğulayırlar.

Sfera.az bu istiqamətdə tövsiyə olunan tədbirlərlə bağlı məlumatı təqdim edir:

Belə ki, viruslardan qorunmaq üçün məsləhət görülən əsas tədbirlərdən biri gigiyenik qaydalarla bağlıdır. Mütəxəssislər qeyd edirlər ki, əlləri sabunla və ən azı 20 saniyə ərzində yumaq vacibdir. Əgər su və sabun əlçatan deyilsə, tərkibində ən azı 60% spirt olan dezinfeksiyaedici məhluldan istifadə etmək məsləhətdir. O cümlədən, əllər çox sayda virusa məruz qala bilər, buna görə də onları yuyulmamış halda gözlərə, burna və ağıza toxundurmamaq vacibdir.

Həkimlərin tövsiyələrinə əsasən, immuniteti gücləndirmək üçün balanslı qidalanma da önəmlidir. Tərəvəz və meyvələr, xüsusilə C vitamini tərkibli qidalar qəbul etmək, çoxlu maye içmək orqanizmin müqavimətini artırır. Soyuq hava isə bədəndəki müdafiə sistemini zəiflədə bilər. Bu baxımdan, isti geyinmək, soyuq yerlərdə uzun müddət qalmamaq məqsədəuyğundur.

Virusun sürətlə yayıla biləcəyi sıx ictimai yerlərdən mümkün qədər uzaq durmaq, sosial məsafəni qorumaq da məsləhətdir. Mütəxəssislər qeyd edirlər ki, evdə təmiz havanı təmin etmək üçün otaqları tez-tez havalandırmaq lazımdır. Qapalı və havasız mühitlər virusların yayılması üçün əlverişlidir.

Əgər qızdırma, ishal və başgicəllənmə kimi əlamətlər yaranarsa, mütləq həkimə müraciət etmək lazımdır. Özbaşına dərman istifadəsi isə tövsiyə olunmur. Yetərli və keyfiyyətli yuxu immuniteti gücləndirir, ona görə də yuxu rejiminə riayət etmək vacibdir. Qeyd olunan tədbirlər viruslardan qorunmaqda mühüm rol oynayır. Mütəxəssislər xüsusilə immunitetin möhkəmləndirilməsini və gigiyenaya diqqət göstərilməsini vurğulayırlar.

Türkan

Yeni viruslar yayılır, necə qoruna bilərik? - Mütəxəssislərdən TÖVSİYƏ