Onkoloji xəstəliklər icbari tibbi sığortaya daxil ediləcək? - AÇIQLAMA
Onkoloji xəstəliklər insanlar arasında sadəcə təlafata səbəb olmur. Belə xəstələrin özləri və doğmaları təlafat baş verənə qədər sarsıntı içində yaşayır. Bu sarsıntının üzərinə də müayinə və müalicə proseslərinin baha olması ailələrə ciddi maddi çətinliklər yaşadır.
Maraqlıdır, onkoloji xəstəliklər icbari tibbi sığortaya cəlb oluna bilərmi?
Bununla bağlı Sfera.az-a açıqlama verən iqtisadçı ekspert Eldəniz Əmirov bildirib ki, bu prosess bir çox xəstəliklərlə müqayisədə icbari tibbi sığortaya daha çox vəsait hesabına başa gələcək, amma çox vəsait lazımdır deyə, ən dəhşətli xəstəliyə düçar olanları sığortadan kənarda saxlamaq olmaz:
"Bir vaxtlar ölkəmizdə icbari tibbi sığortanın tətbiqi məsələsi gündəmə gələn zaman çox vəsait lazım olacağını səbəb gətirərək bunu bir müddət uzatdıq. Amma şükürlər olsun ki, bu sistem ölkəmizdə uğurla tətbiq edilməyə başladı. Müalicə üçün 100 manatı olmayanlar ucqar kəndlərdən paytaxta gəlib 10 min manatlıq əməliyyatları 1 manatsız etdirə bilir. İnsanlar bu gün ölkəmizdə icbari tibbi sığortanın verdiyi fürsətlərdən sevinclə istifadə edə bilir. Tibbi personal da bundan çox məmnundur".
Onun sözlərinə görə, mütləq şəkildə onkoloji xəstəliklərin icbari tibbi sığortaya cəlb olunması istiqamətində real addımlar atılmalıdır:
"Əgər mövcud vəsait bu xəstəliyin müalicəsində A-dan Z-ə hər şeyi qarşılmaq üçün imkan vermirsə, onda heç olmasa nədənsə başlamaq lazımdır. Sonrakı hər il isə sığorta zərfini genişləndirmək olar".
Firuzə Əliyeva
