Oruc tutmağın hansı faydaları var? - \"Bu insanlar həm də...\"

Ramazan ayının başlamasına sayılı günlər qalıb. Ramazanın əsas rəmzi olan oruc, İslamın əsas şərtlərindən biri sayılır. Məhz bu baxımdan insanların çoxu Ramazan ayı boyunca oruc tuturlar.

Bəs oruc tutmağın nə kimi faydaları var?

Mövzu ilə bağlı Sfera.az-a danışan Qida Hərəkatının rəhbəri Məhsəti Hüseynova bildirib ki, oruc, zərərli yeməkləri yemək vərdişini nizama salır. 

"Kökəlməyə səbəb olan, kalorisi yüksək, lakin faydası az olan, dad və görünüş baxımından yanıldıcı qidalara qarşı zəif iradəni aradan qaldırmağa köməklik edir. Alkoqol və siqaret kimi sağlamlığa zərərli vərdişlərdən imtina etməyi asanlaşdırır. Oruc tuta bilən insan həm də öz nəfsini saxlamağı bacarır”.

Mütəxəssis qeyd edib ki, oruc tutmaq, xolesterol mübadiləsini də yaxşılaşdırdığı üçün ürək-damar sağlamlığına da müsbət təsir göstərir. Bundan əlavə, iftar və sahurda düzgün qidalardan istifadə etmək şərti ilə arıqlamağı asanlaşdırır, insulin müqavimətini artırır. 

"Yüksək triqliserid səviyyəsini normal vəziyyətə gətirdiyi üçün ürək-damar sağlamlığına müsbət təsir göstərir”.

M.Hüseynova diqqətə çatdırıb ki, oruc tutmaq hormonların düzgün ifrazına və arıqlamağa kömək edir:

“Oruc, piylənmənin səbəbi olan insulin və leptin müqavimətini yaxşılaşdırmağa kömək edir. Hormonların ifrazı tənzimlənir və arıqlamaq asanlaşır. Qalxanabənzər vəz kimi hormon ifraz edən bəzi digər orqanların fəaliyyətinə də müsbət təsir göstərir”. 

Ülkər Abdurahmanlı