Qarşıdakı 25 il ərzində dünyada xərçəng xəstələrinin sayı 75%-dən çox artacaq. Ən böyük artımın aşağı gəlirli ölkələrdə olacağı proqnozlaşdırılır.
 

Sfera.az xəbər verir ki, ÜST 2050-ci ilə qədər xərçəng xəstələrinin 75% artacağını proqnozlaşdırır. Ekspertlərin fikrincə, aşağı gəlirli ölkələrdə xərçəngdən ölüm halları ikiqat ola bilər.
 

ÜST-nin xərçəngə nəzarət qolu olan Beynəlxalq Xərçəng Araşdırmaları Agentliyinin son məlumatları göstərir ki, 2012-ci ildə dünyada 14,1 milyon xərçəngə yoluxanlar, 8,2 milyon vəfat edənlər olmuşdusa, 2022-ci ildə 20 milyon yoluxma və 9,7 milyon ölümə faktı qeydə alınıb.
 

Agentlik 2050-ci ilə qədər 35 milyondan çox yeni yoluxmalar olacağını, rəqəmlərin 2022-ci ilə nisbətən 77% artacağı, ölüm hallarının isə 2012-ci ildən bəri təxminən iki dəfə artaraq, 18 milyondan çox olacağını proqnozlaşdırır. Həmçinin, aşağı gəlirli ölkələrdə xərçəngə yoluxma hallarının təxminən iki dəfə çox olacağı, daha inkişaf etmiş ölkələrdə isə xəstələnmə statistikasının proporsional şəkildə artacağı gözlənilir.


Xəstəliyin artmasının əsas amilləri tütün, alkoqol istifadəsi, artıq çəki, yaşlanma və əhalinin sürətli artımıdır.

Ağciyər xərçəngi dünyada ən çox diaqnoz qoyulan xərçəngdir və yeni halların 12,4%-ni və ölüm hallarının 18,7%-ni təşkil edir. Qadınlarda döş xərçəngi ikinci ən çox yayılmış xərçəng növüdür. Yoluxma hallarının 11,6%, ölümlərin isə təxminən 7%-dən azını təşkil edir. Digər aparıcı ölüm səbəblərinə qaraciyər və mədə xərçəngi daxildir.

Avropa Tibbi Onkologiya Cəmiyyətinin ictimai siyasət üzrə direktoru Dr Jean-Yves Blay, yeni xərçəng yoluxmalarının "sunami"sinin gözlənildiyini, buna görə də sürətli və qəti hərəkətə keçmək lazım gəldiyini bildirir. O, xüsusən də xərçəngə qarşı peyvəndlərin mütləq olduğunu vurğulayır.


Xatırladaq ki, Amerika Xərçəng Cəmiyyətinin son hesabatında 2024-cü il üçün proqnoz yer alıb. Təkcə ABŞ-da 2 milyondan çox yeni xərçəng yoluxması gözlənilir Bütün bu bədbinliklərə baxmayaraq, alimlər xərçəng müalicəsində yeni mərhələ və irəliləyiş əldə edəcəklərini də inamla bildirirlər. Alimlərin iddiasına görə, xərçəng hüceyrələri artıq immunitet sistemimiz tərəfindən tanınmağa başlayıb.