“Uzun müddət davam edən öskürək öldürücü xəstəliyin əlamətidir” - Həkimdən AÇIQLAMA
Xərçəng xəstəlikləri erkən aşkar edildikdə uğurla müalicə edilir. Əsas məsələ xəstəliyi vaxtında aşkar etməkdir.
Bəs bu xəstəliyin ilkin əlamətləri hansılardır?
Mövzu ilə bağlı Sfera.az-a danışan həkim Bəxtiyar Musayev bildirib ki, səbəbsiz yerə çəki itirmək, arıqlamaq və özünü yorğun hiss etmək xərçəng xəstəliyinin ilkin əlamətləri hesab oluna bilər.
"İştahın birdən-birə kəskin azalması da yaxşı əlamət deyil. Xərçəngin ilkin əlamətlərindən biri də bədəndə səbəbsiz yerə artan ağrılardır. Sidik və nəcisin tündləşməsi və nəcisdə qan izlərinin olması insanları narahat etməli olan problemlərdən biridir. Kəskin qəbizlik və yaxud ishal halları da insan orqanizmində narahatlıq olduğunun göstəricisidir. Uzun müddət davam edən öskürəklər də yaxşı əlamət deyil. Çox vaxt insanlar öskürəyə əhəmiyyət vermir, onun xərçənglə əlaqəli ola biləcəyini düşünmürlər”.
Həkim bildirib ki, xalların böyüməsi və ətraflarının qızarması da xərçəngin ilkin əlamətlərindən ola bilər.
“Xərçəng xəstəliyinin ilkin dönəmində dərialtı vəzlər bərkiyir və formalarını dəyişir. Bu əlamət kişilərdə mədə, ağciyər və prostat xərçəngində, qadınlarda isə süd vəzi, ağciyər, bağırsaq xərçənglərində daha çox rast gəlinir. Xərçəngin yaranma səbəbi siyahısında birinci yerdə genetik amillər göstərilir. Bu isə sübut olunmamış faktdır. Genetik olaraq xərçəngin yaranma ehtimalı 10 faizdir”.
Ülkər Abdurahmanlı
