Həkimdən herpes virusu barədə AÇIQLAMA: "Daha çox cinsi əlaqə zamanı yoluxur" 

Dəri xəstəlikləri arasında ən çox yayılanlardan biri də herpes virusu infeksiyasıdır. 

Bəs bu virusun yaranma səbəbləri nədir və hansı üsullarla müalicə olunur?

Mövzu ilə bağlı Sfera.az-a danışan dermatoloq Sevinc Məmmədova bildirib ki, herpes virusu əsasən dodaqətrafı, üz dərisi, cinsiyyət orqanları və bədənin digər nahiyələrində yarana bilir.

"Herpes "Herpes simpleks 1” və “Herpes simpleks 2” olmaqla 2 yerə ayrılır. Birinci növ herpes bədənin bütün dəri nahiyəsini əhatə edir və daha çox erkən yaşlarda müşahidə olunur. Bu virus sağaldıqdan sonra da dərini tərk etmir və sinir hüceyrələrində gizli şəkildə yaşayır. Orqanizmə daxil olan virus, güclü stress, travma keçirən insanlarda üzə çıxa bilir. Bu virus dəridə yanma, göynəmə, ağrı yaradaraq ağız kənarında içi suluqlu yaralar yaradır”.

Dermatoloq bildirib ki, ikinci növ virus isə cinsi orqanda meydana gəlir. “Bu, əsasən, cinsi əlaqə zamanı partnyorlardan yoluxur. Bu növ herpesə yoluxma faizi daha yüksəkdir. Müalicə zamanı hər iki partnyor virus əleyhinə antibiotiklərdən istifadə etməlidir. Müalicə dövründə cinsi əlaqə məsləhət görülmür”.

Dermatoloq son olaraq əlavə edib ki, xəstəliyin diaqnozu ilkin olaraq analiz və laboratoriya diaqnostikası əsasında aparılır.

Ülkər Abdurahmanlı