Ankara Bilkent Şəhər Xəstəxanası Sinə Xəstəlikləri mütəxəssisi, dosent Sibel Günay son zamanlar havaların soyuması ilə artan, xalq arasında pnevmoniya kimi tanınan aşağı tənəffüs yolları xəstəliyi ilə bağlı açıqlamalar verib.

Sfera.az xəbər verir ki, həkim, immunitet sisteminin zəifləməsi nəticəsində siqaret və spirtli içki qəbul edən fərdlərdə pnevmoniya riskinin artdığını ifadə edib.

Ağız və ya burun yolu ilə bədənə daxil olan havadakı mikroorqanizmlərin ağciyərlərə çatması nəticəsində pnevmoniyanın görülə biləcəyini ifadə edən mütəxəssis, bu problemin xroniki böyrək xəstəliyi, qaraciyər xəstələri, ürək çatışmazlığı, ağciyər xəstələrində daha çox görülə biləcəyini qeyd edib.

Sətəlcəm zamanı ən çox görülən simptomların öskürək və bəlğəm olduğunu ifadə edən həkim “Buna virusların səbəb olduğu pnevmoniyalarda qızdırma, sinə və bel ağrıları, bəzən qarın ağrısı, ürəkbulanma və baş ağrıları da müşayiət oluna bilər. Bu əlamətlər olan xəstələrin tənəffüs sisteminin müayinəsi zamanı bəzi anormal səslər eşidirik və ağciyərdə iltihablı nahiyəni görüb qan analizi ilə infeksiyanı sübut etsək, pnevmoniya diaqnozu qoyuruq”,- deyə bildirib.

S.Günay bildirib ki, pnevmoniya diaqnozu qoyulandan sonra ən qısa zamanda antibiotik müalicəsinə başlanması lazımdır.

Müalicənin ən əhəmiyyətli addımı antibiotiklərdir. Bundan əlavə, istirahət etmək və bol maye içmək müalicəni dəstəkləyir. Çox vaxt pnevmoniya ambulator yolla müalicə edilə bilər. Daha ağır olan pnevmoniya xəstələrinin təxminən 5-10 faizi xəstəxanaya yerləşdirilməlidir.

Bəzən spirtli içki qəbul edən və ya narkotik istifadə edən insanlarda pnevmoniya ağır ola bilər. 65 yaşdan yuxarı xəstələrdə də pnevmoniya daha ağır ola bilər.

Digər tərəfdən mütəxəssis xüsusilə qış aylarında insanların sıx olduğu mühitlərdən qaçınılmalı, maska ​​və məsafə qaydalarına əməl edilməli, əl gigiyenasına diqqət yetirilməli olduğunu sözlərinə əlavə edib


İnci