Şizofreniya ciddi və kompleks ruhi xəstəlikdir. Bu psixozun ən çox görülən formasıdır. Dünyada 100 nəfərdən birində rast gəlinir. Şizofreniyanın əsas əlaməti düşüncə və qavrayışın pozulmasıdır.

Statistikaya görə, dünyada 60 milyona yaxın şizofren var.

Şizofreniyanın yaranma səbəblərindən biri isə qohum evliliyidir.

Bəs bu hansı hallarda özünü biruzə verir?

Mövzu ilə bağlı Sfera.az-a danışan həkim Adil Əliyev bildirib ki, qohum evlilikləri çox risklidir. Xəstə genlərin bir araya gəlməsi bu nikahlardan doğulan uşaqlarda şizofreniyaya rast gəlinmə ehtimalını artırır.

“Hər iki valideyndə şizofreniya varsa, övladın xəstə olması ehtimalı 45-60 faizdir. Ona görə də, ailədə, nəsildə bu problem varsa, hər hansı əlamət olmasa belə, ailə üzvlərinin bu problemlə bağlı araşdırılması, müayinə olunması önəmlidir. Eyni yumurta əkizlərində şizofreniyaya rast gəlinmə faizi yüksək sayılır”.

Adil Əliyev bildiri ki, bu xəstəliyə həkim tərəfindən diaqnoz qoyulmalı və qısa zamanda müalicəyə başlanmalıdır. Xəstəliyin ilkin mərhələsində mövcud simptomlar dərmanlarla kontrol altına alınır, vəziyyəti stabilləşdirilir və müalicəyə uyumlu hala gətirilir. Erkən diaqnoz qoyularsa, müalicə olunarsa, xəstələrin çoxu günlük həyatlarına davam edə bilərlər.

Həkim son olaraq əlavə edib ki, diaqnoz gec qoyulduqda, müalicələrdə axsamalar olduqda xəstəlik xroniki hala keçir. Bu zaman müalicənin əsas məqsədi xəstənin şəxsi gigiyenasına nəzarət edə bilməsi, ev işləri və ya yüngül işlərdə çalışması, dostluq, qohumluq əlaqələrini davam etdirə bilməsidir. Bir sözlə, xəstəlik səbəbindən itirilmiş sosial vəzifələr yenidən qazandırılır.

Ülkər Abdurahmanlı

“Qohum evlilikləri şizofreniya riskini artırır” – HƏKİMDƏN AÇIQLAMA