“Gərginlik, stress, informasiya çoxluğu, yuxusuzluq, yanlış qidalanma və digər amillər yaddaşın zəifləməsinə səbəb olur”.

Sfera.az bildirir ki, bu sözləri həkim-nevroloq Qalib Əsədov deyib.  Onun sözlərinə görə, son zamanlar gənclərin bir çoxu bu problemdən əziyyət çəkir:

“Yaşlandıqca yaddaşın zəifləməsi normal sayıla bilər. Lakin gənclərdə yaddaş zəifliyinin səbəbləri əsasən qeyd etdiyim amillərdir. Yaddaşın yaxşılaşdırılması üçün ilkin olaraq düzgün qidalanmağa, hər gün eyni saatda yatıb durmağa və fiziki işlə məşğul olmağa çalışmaq lazımdır. Bir çox qidalar yaddaşı möhkəmləndirmək bacarığına malikdir. Bunların sırasında balıq əti, balıq kürüsü, yumurta, kakao, qoz və müxtəlif çərəzlər, lobya, meyvə-tərəvəz, süd və digərlərini misal göstərə bilərik. Səhər yeməkləri sağlamlıq üçün xüsusi əhəmiyyət daşıyır. Səhər yeməyi zamanı şirin çay içmək orqanizm üçün çox faydalıdır. Bu, həm də yaddaşın möhkəmlənməsi üçün əvəzolunmaz vasitədir”.

Mütəxəssis bildirib ki, yaddaş zəifləməsinin əsas səbəblərindən biri də damarlarda baş verən dəyişikliklərdir:

“İdmana zaman ayırmaq, eyni zamanda yüksək səslə kitab oxumaq, şeir əzbərləmək, yalnız lazım olan informasiyanı beyində saxlamaq və tərkibində kalsium, fosfor, A, C, E, B vitaminləri olan qidaları qəbul etmək yaddaşın möhkəmlənməsinə kömək edə bilər. Həddindən artıq televizor izləmək də yaddaşa mənfi təsir göstərir. Davamlı olaraq oxumaq, yeni hobbilər əldə etmək, tapmaca həll etmək zehninizi gücləndirər. Həmçinin, kifayət qədər yatmaq lazımdır. Gündə səkkiz saatlıq yuxu ilə beyninizin dincəlməsinə şərait yaradın”.

Günay Rəsulqızı