Mütəxəssislər bildirir ki, sağlamlığı qorumaq üçün mütəmadai olaraq müayinədən keçmək lazımdır. Buna səbəb kimi müxtəlif xəstəliklərin əlamətlərinin özünü gec göstərməsi, bu yolla ağırlaşma hallarıının önlənməsi göstərilir.

Maraqlıdır, heç bir problem olmadığı halda həkim müayinəsində hansı aralıqda olmalıyıq?

Məsələ ilə bağlı Sfera.az-a açıqlama verən terapevt Məlahət Hümbətova insanların yaş kateqoriyalarına uyğun olaraq fərqli aralıqda müayinə edilməli olduğunu deyib:

“Birinci kateqoriya 18-40 yaş arasında olan pasiyentlərdir. Hansı ki, onlar 3 ildə bir dəfə terapevt müayinəsindən keçməlidir. 2 ildə bir dəfə flüoqrafiya, eloktrokardioqrafiya, qan və sidiyin ümumi analizi, ürək damar xəstəliklərinin qarşısını almaq üçün lipid spektrləri və qanda şəkərin miqdarı ilə bağlı analizlər verilməlidir.

İkinci yaş kateqoriyası isə 40-65 yaş arası pasiyentlərdir. Bu yaş aralığında olan pasiyentlər hər il terapevtin müayinəsində olmalı, xəstəlik və şikayətlərindən asılı olaraq, nevropotoloq, kardioloq və oftolmoloq həkimlərin müayinəsindən keçməlidirlər. Bu yaş qrupunda olan şxəslərə hər il elektrokardioqrama, exokardioqrama, qarın boşluğunun ultrasəs müayinəsi olunmalıdır”.

Həkimin sözlərinə görə, xüsusilə qadınlar müntəzəm olaraq həkim yoxlanışında olmalıdırlar:

“Qadınlar müntəzəm olaraq ginekoloq müayinəsindən keçməli və süd vəzilərinin rentgen müayinəsini etdirməlidirlər. Yaş artıqca bütün xroniki xəstəliklər proqressivləşir və onların fəsadları əmələ gəlir. Bu isə yaşayış keyfiyyətinə təsir edir. 65 yaşdan yuxarı pasiyentlərin ildə 2 dəfə terapevt müayinəsində olması məsləhət görülür. Yaşı 40-ı keçən hər kəs iki ildə bir dəfə göz müayinəsi, xərçəng yoxlanışından keçməlidir. Risk faktorları, yeyilən qidalar, hava şəraiti və s. ildə bir dəfə şikayət olmasa da, müayinələr aparılmasını zəruri edir”.

Əzizə Zeynal