Soyuq hava ömrü uzadır.

Sfera.az bildirir ki, bu barədə Almaniyanın Köln Universitetində araşdırma aparılıb.

Tədqiqatçılar soyuğun sağlamlığa necə təsir etdiyini müəyyən etmək üçün soxulcanlar üzərində təcrübələr aparıblar. “Nature Aging” jurnalında dərc edilən araşdırmaya görə, soyuq zədələnmiş zülalların hüceyrələrdən çıxarılması prosesində rol oynayır. Alzheimer və Parkinson da daxil olmaqla, bir çox neyrodegenerativ, xüsusən də irəli yaşlarda baş verə biləcək xəstəliklər bədəndə zərərli zülalların yığılması ilə əlaqələndirilib. Temperaturun zülallara təsirini kəşf etmək isə bu xəstəlikləri yavaşlatmağın yollarını tapmaq yolunda mühüm addım olub.

Laboratoriyada latın adı “Caenorhabditis elegans” olan soxulcanlar və insan hüceyrələri üzərində sınaqlar aparılıb. Nəticədə məlum olub ki, aşağı temperatur “yanal amiotrofik skleroz” (ALS) və Hantinqton xəstəliyində yığılmış zülal aqreqatlarının aradan qaldırılmasını təmin edib. “Proteazom”lar adlanan strukturlar sözügedən protein tullantılarını parçalayıb. Bu strukturların işlək vəziyyətdə qalması və təhlükəli zülal yığılmasını təmizləməsi üçün temperaturun aşağı olması kifayət edib. Qeyd olunub ki, araşdırma soyuqda yaşamalı olduğumuz anlamına gəlmir: “Soyuqdan sağlamlıq üçün praktikada necə istifadə oluna biləcəyini müəyyənləşdirmək istiqamətində daha çox araşdırma lazımdır. Həddindən artıq aşağı temperatur da zərərlidir. Bununla belə, bədən istiliyinin orta dərəcədə azalması orqanizm üçün faydalı təsirlər göstərə bilər”.

Türkan