Yaz fəslinin gəlməsi ilə şəhərin müxtəlif yerlərində - mağaza, piyada keçidi, metro çıxışları, hətta köşklərdə belə gün eynəklərinin satıldığına şahidlik edirik.

Əksər eynəklərin üzərində onların brend markalara məxsus olduğunu iddia edən qeydlər olsa da, həmin aksessuarlar alıcılara 10-15 manata təqdim olunur. Bu isə istehlakçılarda məhsulun keyfiyyəti ilə bağlı  suallar yaradır.

Maraqlıdır, 5-15 manat pul verərək saatlarla gözümüzdə daşıdığımız gün eynəkləri nə dərəcədə etibarlıdır?

Mövzu ilə bağlı Sfera.az-a açıqlama verən Azad İstehlakçılar Birliyinin (AİB) sədri Eyyub Hüseynov hətta günəşli günlərdə belə, gün eynəyindən istifadə etməməyi tövsiyə edib:

“Gün eynəklərinin təkcə Azərbaycanda yox, Portuqaliya, İtaliya çimərliklərində və digər xarici ölkələrdə təsadüfi şəxslər tərəfindən satıldığına şahidlik etmişəm. İnsanlar bu cür eynəklərə üstünlük verirlər və nəticədə isə bu eynəklər gözü məhv edir. Gözü gün işığından qorumağa ehtiyac yoxdur. Mən ən günəşli gündə belə, gözümü məşq etdirirəm ki, günəşə baxa bilim. Təəccüb edirəm ki, hətta qış aylarında belə, qadınlar avtomobilə əyləşən kimi gözlərinə qara eynək taxırlar. Onların gözlərini hansı səbəbdən kor etmək istədiyini anlamıram”.

Ekspert gün eynəklərini almazdan öncə test edilməsinin zəruriliyindən söz açıb. AİB sədri keyfiyyətli gün eynəyinin köməyi ilə normalda havada görə bilmədiyimiz cisimləri görəcəyimizi deyib:

“Ölkədə gün eynəkləri heç kim tərəfindən yoxlanılmır, onlara sertifikat verilmir. Brend eynəklərin çoxunun testləri var. Lakin bizdə mağazalarda, yaxud köşklərdə  belə testlər təqdim edilmir. Eynəkləri pərakəndə şəkildə alırıq. Dünya üzrə də həkimlər hansı gözə hansı gün eynəyinin lazım olduğu ilə bağlı diaqnostika aparmır. Həkimlər sadəcə, əməliyyatdan sonra bir müddətlik gün eynəyindən istifadə etməyi tövsiyə edirlər. Gün eynəyinin baha olması onun brend olması, keyfiyətli olması anlamına gəlməz. Bu tip eynəkləri  alarkən sertifikat, test tələb etmək olar”.

Əzizə Zeynal