Son günlər “Marburq” virusu müzakirə obyekti olub.

Sfera.az bildirir ki, sözügedən virus Afrikanın Tanzaniya bölgəsində 5 nəfərin ölümünə səbəb olub. Qeyd olunub ki, yüksək yoluxucu virus bir sıra əlamətlərlə “Ebola”ya olduqca oxşardır. Ümumdünya Səhiyyə Təşkilatının (ÜST) məlumatına görə, “Marburq” virusu yoluxduğu insanların orta hesabla yarısını öldürür.

“Marburq” virusu haqqında nələr bilinir?

Virusa ilk dəfə 1967-ci ildə Almaniyanın Frankfurt və Marburq şəhərlərində, Serbiyanın paytaxtı Belqradda 31 nəfərdə rast gəlinib, 7 nəfərin ölümünə səbəb olub. Xəstəliyin mənbəyinin Uqandadan gətirilən yaşıl meymunlar olduğu bildirilib. Lakin o vaxtdan bəri virusla əlaqəli digər heyvanların da adı çəkilib. Belə ki,  yarasaların yaşadığı mədənlərdə və mağaralarda uzun müddət qalan insanlarda da sözügedən infeksiyaya rast gəlinib. Ötən illərdə Marburq virusunun yayılması bu ölkələrdə baş verib: Ekvatorial Qvineya, Qana, Konqo Demokratik Respublikası, Keniya, Cənubi Afrika, Uqanda, Zimbabve.

2005-ci ildə Anqolada baş verən epidemiyada 300-dən çox insan ölüb. Dünyanın qalan hissəsində isə 40 il ərzində “Marburq” virusundan cəmi iki nəfər ölüb. Bu ölümlərdən biri Avropada, digəri isə ABŞ-də baş verib. Hər iki şəxs Uqandada mağara ekspedisiyalarında iştirak ediblər.

“Marburq” virusunun əlamətləri nələrdir?

Virusa yoluxanlarda qızdırma, şiddətli başağrısı və əzələ ağrıları görünür. Ümumiyyətlə, üç gün ərzində ishal, qarın ağrısı, ürəkbulanma və qusma şikayətləri olur. Ümumdünya Səhiyyə Təşkilatının məlumatına görə, bu mərhələdə xəstələrin görünüşü solğun və yuxulu olur. Bir çox insan bədəninin müxtəlif yerlərində qanaxma baş verir. Bəziləri həddindən artıq qan itkisi və şokdan səkkiz-doqquz gün sonra ölürlər. Virus üçün xüsusi müalicə və ya peyvənd yoxdur.

Günay Rəsulqızı