“Avropanın bir çox ölkələrində müşahidə olunan isti hava şəraiti virusların da yayılmasına səbəb olub. İndiki xəstəliklər müxtəlif variasiyalarda gedir: yüksək qızdırma; qızdırma və boğaz ağrısı; qızdırma, öskürək və burun tutulması; qızdırma, qusma və ishal”.

Sfera.az bildirir ki, bunu tanınmış pediatr Vaqif Qarayev deyib.

O bildirib ki, ən çox narazılıq yaradan faktor isə qızdırmanın aqressivliyi və dərmana tabe olmamasıdır:

“Dərmanların keyfiyyəti ilə bağlı iradlarla razılaşmaq olar. Amma dərman qəbulundan sonra qızdırmanın normaya düşməsinə çalışmaq lazım deyil. Uşaqlarda qızdırma üç gündən artıq davam edərsə, mütləq müayinə olunmalıdılar. Özbaşına antibiotik qəbulu vəziyyəti ağırlaşdıra bilər. Üç yaşına qədər uşaqlarda qusma və ishal varsa, ilk gündən mütləq həkim nəzarətində olmalıdırlar”.

Mütəxəssis həmçinin qeyd edib ki, burada xalq təbabətindən istifadə qadağan deyil:

“Hamını nənə-babalarımız belə böyüdüb. Amma təhlükəli məqamları da qeyd etdim. Çox vaxt həkimsiz keçinmək olmur. Ənənəvi təhlükə isə yenə də qalır - xəstə uşaqların kollektivə getməsi...Valideynləri narahat edən məsələlərdən biri də uşaqların sağalandan sonra təkrar yoluxmasıdır. Kollektivə gedən uşaq isə sağalandan sonra təkrar başqa virusla yoluxur”.

Günay Rəsulqızı