ABŞ-ın Florida ştatında ət yeyən bakteriyaların sayının artması panikaya səbəb olub.

Sfera.az bildirir ki, səhiyyə rəsmiləri bakteriyanın səbəb olduğu “Vibrio vulnificus” xəstəliyinin və ölüm hallarının artdığını açıqlayıb.

Məlumata görə, xüsusilə “Lee County” şəhərində bu il 29 nəfər bakteriyaya yoluxub və 4 ölüm faktı müşahidə edilib.

2020-ci ildə heç bir yoluxma hadisəsi görünməsə də, 2021-də şəhərdə cəmi 5 yoluxma halı və 1 ölüm qeydə alınıb.

Səlahiyyətlilər epidemiyanın artmasının əsas səbəbini İan qasırğasının yaratdığı sel suları ilə əlaqələndiriblər. Daşqın suları ilə əlaqədar kanalizasiya sularının içməli su şəbəkəsinə qarışması bakteriyaların sayını artırıb.

Mütəxəssislər xəbərdarlıq ediblər ki, açıq yaraları və kəsikləri olan insanlar birbaşa bu bakteriyaya məruz qala bilərlər: “

”Vibrio vulnificus” bakteriyaları adətən isti və duzlu sularda olur. Adətən insan orqanizminə çiy və ya az bişmiş balıq yedikdə daxil olur. Açıq yara isti dəniz suyuna məruz qaldıqda bakteriyalar dəriyə də yoluxa bilər. Xalq arasında “ət yeyən bakteriya” adlandırılan “Vibrio vulnificus” açıq yara ətrafında əti yeyərək nekrotizan fasiit infeksiyasına səbəb olur. Xəstəliyin irəliləməsi insanların qol və ayaq kimi əzalarını itirməsinə səbəb olur. Ət yeyən bakteriyalara yoluxan zaman qırmızı yaralar, dərinin şişməsi, yüksək hərarət, nəfəs darlığı kimi simptomlar müşahidə edilir. Bu bakteriya insandan insana keçmir”.

Həmçinin bildirilib ki, çirkli su ilə təmasdan sonra açıq yaraları bol sabun və su ilə yumaq məsləhətdir.

Türkan,

Sfera.az

ABŞ-da HƏYƏCAN TƏBİLİ: Ət yeyən bakteriyalar artır...