Payızda dünya yeni epidemiya ilə qarşılaşacaq: Son 5 həftədə yoluxma artır
Dünyada son 5 həftədə COVID-19-a yoluxma hallarının yenidən artması müşahidə edilir. Ümumdünya Səhiyyə Təşkilatının (ÜST) açıqladığı həftəlik hesabata görə, ötən həftə dünyada 5,7 milyon COVID-19-a yoluxma faktı aşkar edilib. Yoluxmaların sayı isə əvvəlki həftə ilə müqayisədə 6 faiz artıb.
Sfera.az xəbər verir ki, 2022-ci ilin mart ayından etibarən azalan yoluxma sayı iyunun ikinci yarısından etibarən yenidən artmağa başlayıb. Artımın dünyada “Omicron” variantının yüksək yoluxucu alt variantlarının yayılmasının artması ilə əlaqədar olduğu təxmin edilir.
Digər tərəfdən, ÜST qeyd edib ki, yoluxmaların sayının artmasına baxmayaraq, virusa bağlı ölümlərdə ciddi artım müşahidə olunmayıb. Ötən həftə dünya üzrə 9800 ölüm qeydə alınsa da, əvvəlki həftə ilə müqayisədə bu rəqəm dəyişməyib. Regional olaraq, ən çox artım Qərbi Sakit Okean (28%) və Yaxın Şərqdə (25%) müşahidə olunub.
Bu variantlara yoluxmanın daha sürətlə baş verməsinə səbəb peyvəndlərin yaratdığı immunitetə müqavimət göstərmək imkanı ilə bağlıdır. Trend davam edərsə, payızda bütün dünyada yeni epidemiya dalğasının baş verə biləcəyi proqnozlaşdırılır.
Vasif
Sfera.az