Ötən gün Ümumdünya Səhiyyə Təşkilatı pandemiyanın davam etməsi və koronavirusun yeni mutasiyalarının aşkarlanması ilə bağlı xəbərdarlıq edib. Qeyd olunub ki, hazırda ABŞ, Fransa, Böyük Britaniya və Almaniya kimi ölkələrdə kəskin artım müşahidə olunur.

Bəs Azərbaycanda vəziyyət necədir?

Bununla bağlı Sfera.az-a açıqlama verən Səhiyyə Nazirliyinin mütəxəssis-eksperti Zakir Quliyev deyib ki, Azərbaycanda da ötən aylarla müqayisədə virusa yoluxmada artım müşahidə olunur:

“Gələcəkdə rəqəmlərin daha da təhdidedici səviyyəyə çatmaması üçün vətəndaşlarımızdan karantin rejiminin qaydalarına riayət etmələrini xahiş edərdim. Bunu deyərkən, gigiyena qaydaları və sosial məsafəni nəzərdə tuturam. Digər tərəfdən, Avropa virusoloqları ilk dəfə iyunun sonunda Hindistanın bir neçə bölgəsində aşkar edilən və digər ölkələrə, o cümlədən Böyük Britaniya, ABŞ, Avstraliya, Almaniya və Kanadada yayılan “Omicron”  ştamının yeni variantının (BA.2.75) ortaya çıxmasından narahatdırlar. Bəzi mutasiyalar virusun xüsusiyyətlərində dəyişikliklərə səbəb ola bilər. Mutasiyalar arasında virusun necə ötürüldüyü və ya səbəb olduğu xəstəliyin şiddəti araşdırılır. Virusun ilkin ştamlarında da eyni mənzərəni gördük. Nəzərə almaq lazımdır ki, koronavirusun öldürücülük qabiliyyəti azalarkən, yoluxuculuq qabiliyyəti artır”.

Mütəxəssis qeyd edib ki, “Omikron” variantına yoluxma bir çox insanda boğaz ağrısı, burun axması və baş ağrısı kimi ümumi soyuqdəyməyə bənzər simptomlarla müşayiət olunur:

“COVID-19-un ilkin mutasiyalarına aid olan iybilmə və ya dad hissinin yoxa çıxması, öskürək və qızdırma kimi simptomlar hələ də yoluxmanın əsas əlamətləri hesab olunur. Koronavirusun “Delta” və “Omicron” ştamlarını müqayisəsi onu göstər ki, “Delta”da ölüm nisbəti daha yüksəkdir. Koronavirusun yeni dalğasından qorunmaq üçün gigiyenik qaydalara - tez-tez əlləri yumaq və ya antiseptik vasitələrdən istifadəyə davam etməyi tövsiyə edirəm. Ciddi zərurət yaranmadığı halda insanların kütləvi toplaşdığı məkanlardan çəkinmək, qapalı məkanlarda, ictimai nəqliyyatda sıxlıq olduğu təqdirdə qoruyucu maskalardan istifadə etmək lazımdır”.

Günay Rəsulqızı