"Azərbaycanda doğulan uşaqların sayı 1950-ci illərin göstəricisinə düşüb" - Ailələrə müavinət verilməsi təklif edilir
"Putin hər üçüncü uşağa görə 14 min dollarlıq müavinət verməyi təklif etdi. Biz hər ikinci uşağa görə 12,7 min dollar təklif edəndə düşük lətifələr təklifimizi kölgədə qoymuşdu: "Bəy, əkiz doğulsalar, onda uşağın hansına pul düşməlidir?"”.
Sfera.az bildirir ki, bunu REAL partiyasının sədri İlqar Məmmədov deyib. O qeyd edib ki, REAL-ın da baxışı, Putinin də təklifi, "dolanışıq" təminatı deyil, demoqrafik problemə görədir:
"Bu il Azərbaycanda çox az uşaq doğulub. Say 1950-ci illərin göstəricisinə düşüb. Ölüm sayı isə iki ildir rekordlar qırır. Ötən ilin 8 ayında normadan artıq 11 faiz adam ölmüşdüsə, bu il 27 faiz. REAL-ın "uşaq pulu" təşəbbüsü məhz bu demoqrafik problemin çözümünə yönəlmişdi”.
Partiya sədri bildirib ki, Putinlə REAL-ın təşəbbüsündə fərqlər də var:
"Rusiya rəhbərliyi müavinəti birdəfəlik verməyi də mümkün sayır. Məsələn, ailə Uzaq Şərq əyalətlərində bu puldan da istifadə edərək ev alıb yaşamaq istəsə. Bizdə demoqrafik problemin ərazi tərəfi o qədər də kəskin deyil deyə, buna ehtiyac duymadıq, müavinəti aylıq təsəvvür edirdik. Amma bu istiqamətdə də düşünmək olar”.
Türkan
Sfera.az
