Rusiya Türkiyəyə uçuşları niyə ləğv etdi? – “Pandemiya bəhanədir, əsl səbəb...”
13:43 / 13.04.2021
937
"Rusiyanın Türkiyəyə münasibətdə atdığı bu addım
beynəlxalq hüquqa ziddir”.
Bu sözləri Sfera.az-a açıqlamasında Ankara ilə
Kiyev arasında bağlanan müqavilələrin ardınca Rusiyanın pandemiyanı əsas gətirərək
aprelin 15-dən iyunun 1-dək Türkiyəyə hava uçuşlarını dayandırmasına münasibət
bildirərkən politoloq Məhəmməd Əsədullazadə deyib.
Politoloq düşünür ki, Moskvanın sözügedən
addımı qərəzli və qanunsuzdur: "Ukrayna prezidenti Volodimir Zelenskinin
Türkiyəyə səfəri çərçivəsində iki ölkə arasında 20 bənddən ibarət müqavilə
imzalanıb. Ankaranın Kiyevlə siyasi, hərbi-texniki
sahədə əməkdaşlığı isə Moskva tərəfindən ciddi narahatlıqla qarşılanıb. Buna
cavab olaraq, ötən gün Rusiya XİN rəhbəri Sergey Lavrov Ankaranı Kiyevi
qızışdırmaqda ittiham edib”.
Həmsöhbətimiz bildirib ki, Kremlin Türkiyə-Ukrayna
yaxınlaşması fonunda Ankaraya münasibətdə belə mövqe sərgiləyəcəyi gözlənilən
idi. Onun fikrincə, Rusiya hətta digər addımlar da ata bilər:
"Belə bir vəziyyətdə
45 gün müddətinə Rusiyanın Türkiyəyə hava reyslərini dayandırması Ankaranın
Ukrayna siyasətinə narazılıq kimi dəyərləndirilə bilər. Hətta sonrakı mərhələdə
bu müddəti bir qədər də uzada bilərlər. Moskvanın həmin addımı isə heç də özlərinin
elan etdikləri kimi, pandemiya ilə bağlı deyil. Ona qalsa, Rusiya pandemiyanın
tüğyan etdiyi dünyanın bir çox digər ölkəsilə nəqliyyat əlaqəsini, o cümlədən hava
uçuşlarını davam etdirir. Türkiyənin Ukraynanı "Bayraktar” PUA-ları ilə
silahlandırması Moskvanın belə bir addım atmasına gətirib çıxarıb”.
Elçin