“Rusiya 175 minlik heyətlə Ukraynaya hücum edəcək” - ABŞ-ın kəşfiyyat planı İFŞA OLUNDU
17:00 / 06.12.2021
703
Rusiya 175 min nəfərlik hərbi qüvvə ilə Ukraynanı işğal etməyi planlaşdırır.
Sfera.az bildirir ki, bu barədə ABŞ tərəfindən hazırlanan kəşfiyyat hesabatı ifşa olunub. "Washington Post” qəzetində dərc olunan xəbərə görə, Rusiya gələn ilin əvvəlində Ukraynaya müxtəlif cəbhələrdən hücumlar edəcək.
Adının çəkilməsini istəməyən ABŞ administrasiyasındakı mənbə bildirib ki, Rusiyanın gələn ilin əvvəlinə planlaşdırılan hücumunda Ukrayna ilə sərhəddə yaz aylarındakı təlimində istifadə olunanlardan iki dəfə çox hərbçi iştirak edəcək.
"Plana 175 min nəfərlik hərbi qüvvə, 100 batalyon taktiki qrupu, zirehli artilleriya, böyük miqdarda döyüş sursatı daxildir”, - deyə mənbə əlavə edib. ABŞ kəşfiyyatının məxfi hesabatlarında olan peyk fotoşəkilləri, Rusiya qüvvələrinin dörd fərqli bölgədə cəmləşdiyini göstərib. Sənədlərə əsasən, əraziyə yeni gələn tanklar və artilleriya ilə birlikdə 50 döyüş taktiki qrupu yerləşdirilib.
Qeyd edək ki, bundan əvvəl, Ukrayna müdafiə naziri sərhədlərində toplanan rus hərbçilərinin sayının 94 min olduğunu açıqlamışdı.
Günay Rəsulqızı
Sfera.az