Zaporojye cəbhəsində gərginlik: Ağır döyüşlər gedir
Zaporojye cəbhəsində hərbi əməliyyatların coğrafiyası kəskin şəkildə genişlənir və tərəflər arasında informasiya müharibəsi daha da intensivləşir.
Sfera.az xəbər verir ki, Rusiya Federasiyası Müdafiə Nazirliyi rəsmi bəyanat yayaraq Zaporojye vilayətinin strateji baxımdan əhəmiyyətli sayıla biləcək Rıbalskoye yaşayış məntəqəsinin Rusiya Silahlı Qüvvələri tərəfindən tam nəzarətə götürüldüyünü elan edib. Rusiya tərəfi bu irəliləyişi cəbhənin həmin istiqamətindəki mövqelərin möhkəmləndirilməsi kimi təqdim edir.
Lakin Ukrayna tərəfi və cəbhədəki real vəziyyəti yaxından izləyən müstəqil hərbi mənbələr bu məlumatı təsdiqləmirlər. Xüsusilə Ukrayna Müdafiə Qüvvələrinin əməliyyat şəraitini operativ işıqlandıran "DeepState" analitik resursunun yenilənmiş xəritələrində Rıbalskoye kəndi hələ də Ukrayna ordusunun tam nəzarəti altında, yəni "mavi zona"da göstərilir. Ekspertlərin fikrincə, ərazidə şiddətli qarşılıqlı artilleriya atışmaları və lokal hücum əməliyyatları davam etdiyindən yaşayış məntəqəsi "boz zona" statusuna keçmiş ola bilər.
Qarşıdurmaların gedişində konkret nəzarət zonasının kimdə qalması ilə bağlı rəsmi Kiyevdən hələlik əlavə şərh verilməyib./musavat
