19:T7f8,

Süni intellektin (Sİ) sürətlə inkişafı iş bazarında mühüm dəyişikliklərin əsasını qoyur.

Sfera.az xəbər verir ki, yaxın illərdə bir sıra peşələrdə avtomatlaşdırma dərəcəsi artacaq və bəzi işlərin böyük hissəsini robotlar icra edəcək.

İlk növbədə təkrarlanan və standart prosedurlara əsaslanan işlər risk altındadır. Bunlara məlumatların emalı, kargüzarlıq, kassir xidməti, telefon operatorluğu, sürücülük və anbar əməliyyatları daxildir. Sİ sistemlərinin yüksək dəqiqliklə işləməsi bu sahələrdə insan əməyinə tələbatı azalda bilər.

Eyni zamanda, media və yaradıcılıq sahələrində də müəyyən dəyişikliklər gözlənilir. Artıq xəbər mətnlərinin ilkin versiyasını hazırlayan alqoritmlər, şəkil və video montajını avtomatlaşdıran proqramlar media işçilərinin yükünü azaldır. Dizayn, tərcümə və müştəri xidmətlərində də Sİ tərəfindən icra olunan proseslərin sayı artır.

Bununla belə, bütün sahələr eyni dərəcədə risk daşımır. Emosional qərarvermə, yaradıcı düşüncə, strateji planlaşdırma, insanlarla birbaşa ünsiyyət və empatiya tələb edən peşələr, müəllimlik, psixologiya, həkimlik, idarəetmə və jurnalistika avtomatlaşdırılması ən çətin sahələr kimi qiymətləndirilir. Bu peşələrdə Sİ daha çox köməkçi vasitə rolunu oynayacaq.

Ümumilikdə, süni intellekt bəzi işləri tam əvəz etsə də, bir çox sahələrdə insan əməyini tamamlayan, işin keyfiyyətini yüksəldən vasitəyə çevrilir. İş bazarında rəqabət qabiliyyətini qorumaq üçün yeni bacarıqların analitik düşüncənin, texnologiya biliklərinin, yaradıcılığın daha da vacib olacağı vurğulanır.

Niyaz Hacıyev
Sfera.az

Süni intellekt bu işçiləri əvəz edəcək — ARAŞDIRMA