Çin avtomobillərinə tələbat kəskin azalacaq. Belə ki, hibrid avtomobillər üçün güzəşt müddətinin uzadılmaması fonunda bu maşınlara ümumiyyətlə yaxın gedən olmayacaq. Əvvəllər sırf ucuz olduğu üçün alınan bu maşınların qiymətindəki kəskin artım onlara olan tələbata ciddi şəkildə mənfi təsir edəcək.

Ümumiyyətlə son illərdə Çin avtomobilləri bazara böyük iddialarla daxil olub. Hər yerdə yeni modellər, texnologiya ilə dolu reklamlar, "elektrikli gələcək" şüarları... Amma reallıqda bu parıltının arxasında çox ciddi çatlar görünür.

Birincisi, keyfiyyət və etibarlılıq məsələsi hələ də Çin markalarının ən böyük zəif nöqtəsidir. Avtomobilin ilk bir-iki ilində hər şey normal görünsə də, uzunmüddətli istismar zamanı plastiklərin cızılması, asqı sisteminin tez sıradan çıxması, elektronik problemlər və bəzən təhlükəsizlik avadanlıqlarının işləməməsi kimi hallar tez-tez baş verir. Yəni bu maşınlar "yeni görünmək" üçün dizayn edilir, amma "davamlı olmaq" üçün yox.

İkincisi, brend etibarı və dizayn orijinallığı məsələsidir. Çin avtomobillərinin bir çoxu Avropa və Yapon modellərinin açıq-açıq surətidir - ön panjur BMW-dən, arxa fənərlər Audi-dən, interyer Mercedes-dən. Texnologiya sahəsində də bu təqlidçilik çox hiss olunur. Nəticədə, avtomobil xaricdən cazibədar görünsə də, içində "öz kimliyi" yoxdur.

Üçüncüsü, təhlükəsizlik və sertifikatlaşdırma. Avropa NCAP və ya IIHS testlərində real nəticə göstərən Çin modelləri çox azdır. Çoxu ya zəif bal toplayır, ya da ümumiyyətlə testlərə qatılmır. Çin bazarı daxilində satılan modellər üçün təhlükəsizlik standartları da çox zaman "göstəriş xatirinə" yazılır.

Və nəhayət, qiymət və dəyər balansı. Bəli, Çin avtomobilləri adətən ucuz olur. Amma "ucuz" bəzən "dəyərli" demək deyil. Çox vaxt bu qiymət fərqi keyfiyyətin, materialın və etibarlılığın hesabına əldə edilir. Yəni illərlə sınanmış Toyota, Honda, BMW və ya Volkswagen ilə müqayisə aparmaq hələ çox tezdir.

Qısası, Çin avtomobilləri bu gün üçün parlaq və cəlbedici görünə bilər. Amma avtomobil sadəcə dizayn və ekran demək deyil, ruh, etibarlılıq və uzunömürlülük məsələsidir. Bu sahədə Çin hələ yolun başlanğcındadır.

Çin avtomobillərinin bazardakı "liderlik"dövrü bitir