Antaliyanın ikonik tikililərindən biri olan və hər gün on minlərlə yerli və xarici turistin keçdiyi tarixi Saat Qülləsində texniki nasazlıqlar səbəbindən zaman dayanıb.

Sfera.az xəbər verir ki, bərpa prosesi zamanı saat qalmaqalı ortaya çıxıb.

9-cu əsrdə Bizans dövrünə aid qalalar üzərində tikilmiş və Sultan II Əbdülhəmidin hakimiyyəti dövründə saat qülləsinə çevrilən bu qədim tikili, son illərdə xroniki nasazlıqlar və əməliyyat problemləri səbəbindən xəbər başlıqlarında yer almağa davam edir.

Qüllənin müasir dövrdəki uğursuzluqları 2022-ci ildə başlanan genişmiqyaslı bərpa işləri ilə üzə çıxıb. Araşdırmalar tarixi mexaniki saatın oğurlandığını və keyfiyyətsiz plastik saatla əvəz olunduğunu ortaya qoyub. Antalya Valiliyi tərəfindən əlaqələndirilən araşdırmalar orijinal mexanizmin 1985-ci ildə itirilmiş ola biləcəyini irəli sürüb. İstanbulda bir kolleksiyaçının əlində oxşar bir mexanizm tapıldıqdan sonra, 3,6 milyon Türk Lirəsi (təxmini 114 min Azn) büdcəsi və sponsorluq dəstəyi ilə etibarlı bir replika əldə edilərək diqqətlə qülləyə quraşdırılıb.

Orijinal dizaynına uyğun olaraq bərpa edilən saatlar tezliklə texniki nasazlıqlar yaşamağa başlayıb.

Yoxlamalar saatların fasiləsiz enerji təchizatına qoşulmadığını, ərazidəki elektrik kəsintilərindən təsirləndiyini və funksionallığını itirdiyini aşkar edib. Mexaniki quruluşdan elektron sistemə keçid nasazlıqların tezliyini artırıb və qüllədəki dörd saatın hamısının artıq tamamilə dayandığı müşahidə edilib.

Kale Kapısı Sənətkarların Gücləndirilməsi və İnkişafı Dərnəyinin prezidenti Hasan Kilit:

“Bu, Osmanlı dövründə Türkiyədə tikilmiş 8 tarixi tikilidən biridir. Amma biz sadəcə bunu düzgün edə bilmirik. Hər kəs bir şey etməyə çalışır”-deyə bildirib.

Şəhərin ən vacib mədəni irslərindən biri olan bu tikilinin davamlı idarəetmə yanaşması ilə yenidən işlək vəziyyətə gətiriləcəyi gözlənilir.

Aynil

Sfera.az

Min illik qüllədən saat oğurlandı