"Hazırda ətrafımızda kifayət qədər çoxsaylı təlatümlər, münaqişələr və müharibələr mövcuddur. Bu proseslər məntiqi sonluğuna çatmayana qədər sərhədlərin açılması məqsədəuyğun görünmür".

Sfera.az bildirir ki, bunu hərbi ekspert Ədalət Verdiyev Metbuat.az-a açıqlamasında Azərbaycanın quru sərhədlərinin hələ də bağlı qalmasının səbəblərindən danışarkən söyləyib.

O bildirib ki, sərhədlərin açıq olması Azərbaycana münaqişə və müharibələrin davam etdiyi ölkələrdən kütləvi insan axınına səbəb ola bilər:

"Azərbaycan isə hazırda prioritet olaraq erməni işğalı nəticəsində məcburi köçkün və qaçqına çevrilmiş vətəndaşlarının doğma yurd-yuvalarına qayıtması məsələsini əsas hədəf kimi müəyyənləşdirib. Bu baxımdan, bizi öz prioritetlərimizdən yayındıra biləcək məsələlərin, o cümlədən digər ölkələrdən kütləvi insan axınının qarşısını almaq üçün sərhədlərin bağlı saxlanılması zəruridir".

Ə.Verdiyevin fikrincə, regionda və qonşu ölkələrdə baş verən münaqişələr həll olunduqdan sonra sərhədlərimiz də açılacaq:

"Sərhədlərin bağlı qalması dövlət üçün kifayət qədər ciddi maliyyə yükü yaradır. Lakin təhlükəsizlik amili daha önəmli olduğu üçün hazırda sərhədlər bağlı saxlanılır. Sərhədlərin açıq olması Azərbaycana kütləvi şəkildə daxil ola biləcək insanlar arasında terror qruplaşmalarının üzvlərinin də olmasını mümkünsüz etmir. Yəni sərhədlərin açıq qalması kütləvi insan axını ilə yanaşı, Azərbaycana qarşı fəaliyyət göstərə biləcək xarici xüsusi xidmət orqanlarının və terror qruplaşmalarının üzvlərinin də ölkəyə daxil olmasına şərait yarada bilər. Məhz bu səbəbdən Azərbaycan hazırda sərhədlərini bağlı saxlayır. Bu, təhlükəsizliklə bağlı zəruri və məcburi atılan bir addımdır”.

Quru sərhədləri nə vaxt açılacaq?