Narkobaronun həbsxanadan şok qaçış planı: Məşhur müğənni hamını aldadıb

 

Hoakin Qusman 2015-ci ildə Meksikada saxlanıldığı sərt rejimli həbsxanadan uzunluğu 1.5 kilometrə çatan yeraltı tunellə qaçıb. Bu, "Gödəkboy”un Meksika həbsxanasından ikinci qaçışı idi. Lakin təxminən bir il sonra Qusman Meksika xüsusi təyinatlıları tərəfindən saxlanılıb və mühakimə olunmaq üçün ötən il ABŞ-a təhvil verilib. "Gödəkboy” Amerikaya 14 milyard dollarlıq kokain keçirib satdırmaqda və digər çoxsaylı cinayətlərdə ittiham olunur. Onun iki dəfə həbsxanadan necə qaçması olduqca ilgincdir.  Güclü nəzarətdə qorunan narkobaron necə olur ki, iki dəfə həbsxanadan qaçır. Onun məhkəməsi zamanı bu detallar müzakirə olunmadı. Çünki onun qaçış planını həyata keçirən Meksikalı müğənni və aktrisa Blinda  olub. Müğənninin saxta sənədlə onun qaçış planını hazırladığı ortaya çıxıb. Onun prezidentə qədər çıxışı olduğu iddia edilir.

 

Qusmanın məhkəməsi Nyu-Yorkda 2018-ci il noyabrın əvvəllərində başlayıb və 4 ay davam etməsi gözlənilir. Dünənki məhkəmə prosesində ifadə verən Martinez deyib ki, "Gödəkboy”un hər sahilyanı kurort şəhərində evləri, hər əyalətdə malikanələri vardı. Kokain ticarətindən əldə edilən pullar bu evlərdə saxlanılırdı.

Şahid ifadəsində deyib ki, "Gödəkboy”un başçılıq etdiyi Sinaloa karteli sərhədin altından qazılan tunellər, gizli bölmələri olan yanacaq çənləri və istiot qutularında ABŞ-a hər il tonlarla kokain keçirirdi. Qusman hər ay üç özəl təyyarəsini göndərib kokain ticarətindən əldə edilən pulları toplayırdı və hər təyyarə 10 milyon dollara qədər nəğd pul daşıyırdı. Bu pulların bir qismi çuvallarla Meksika banklarına aparılır, işçilərə rüşvət verməklə pesoya çevrilirdi.

 

Martinez Qusmanın Acapulco sahillərindəki villasında zooparkın olduğunu danışıb. O, arabir özünün kiçik şəxsi qatarı ilə həmin zooparkdakı vəhşi heyvanlara baxmağa gedirdi. Zooparkda şirlər, pələnglər və digər yırtıcılar saxlanılırdı.