Mənzil bazarında qiymət bumu yaşanır - "Qanunlar sərtləşdirilsə bunlar olmaz"

Son illərdə Azərbaycanın mənzil bazarında qiymətlərin sürətlə artması müşahidə olunur. Güclü bahalaşma dinamikası artıq dördüncü ilə keçib. 

Açıqlanan məlumatlara əsasən, Bakı şəhərində yeni tikililərdə 1 kvadrat metr mənzilin orta qiyməti təxminən 2 167 AZN, köhnə tikililərdə isə 1 800-1 900 AZN ətrafındadır. 2025-ci ilin aprelində Bakı şəhərinin mənzil bazarında yeni tikililərin kvadrat metri təxminən 2 300-2 400 AZN, köhnə tikililərin isə 2 000-2 050 AZN olub. 
İlkin bazarda qiymətlər daha sürətlə artır. Son bir ildə ilkin bazarda qiymət artımı 10-15%  olub. Rəsmi statistika göstərir ki, 2024-2025-ci illərdə illik müqayisədə mənzil qiymətləri Bakı üçün təxminən 8-17% artıb. 

 

Paytaxtda, yeni tikililər və köhnə mənzillər bazarında müşahidə olunan qiymət artımı bir çox vətəndaş üçün mənzil almağı çətinləşdirib. Alıcıların böyük qismi yalnız uzunmüddətli ipoteka krediti ilə ev sahibi ola bilir, kirayə bazarında isə şişirdilmiş qiymətlər əlavə problemlər yaradır. Bütün bunlar ictimaiyyətdə haqlı suallar doğurur: mənzil bazarında davam edən bu cür bahalaşma normal haldırmı, yoxsa qiymət artımları süni şəkildə baş verir? 

 

Mövzu ilə bağlı Sfera.az-a açıqlama verən iqtisadçı ekspert Günay Hüseynova bildirib ki, rəqabət mühitində qiymətlər alıcının büdcəsinə uyğun olmalıdır.

 

 

Onun sözlərinə görə, hazırda isə nə qiymətlər enir, nə də şərtlər sərfəlidir:

 

“Bundan əlavə, keyfiyyət standartları da tələbatı qarşılamır. Əksər yeni tikililərdə istənilən qədər boş ev mövcuddur. Alınan mənzillər ya imkanlı şəxslər tərəfindən alınaraq kirayə verilir, ya da ən yaxşı halda 25 illik ipoteka ilə götürülür. Sosial mənzillər, "makler evləri", qiymətlərin baha olması səbəbindən torpaq alıb ev tikdirənlər də bu bazara təsir edən faktorlar arasındadır. Tikinti şirkəti və ya sahibkar isə mənzilləri satmaqda tələsmir. Onlar düşünür ki, evi boş saxlayıb sonra daha yüksək qiymətə sata bilərlər”.

 

Mütəxəssis qeyd edib ki, qanunlar sərtləşdirilsə bu kimi hallar yaşanmaz:

 

“Bir mənzilin tikintisində kvadrat metri neçəyə başa gəldiyinə və alıcıya hansı qiymətə təklif olunacağına nəzarət yoxdur. Həmçinin, şəxs digər mənzilləri alarkən ədalətli vergi sistemi tətbiq olunmur.
Mövcud bahalaşma dinamikası bu sahəyə müdaxilə olana və ya həmin şirkətin və ya şəxsin likvidlik ehtiyacı duyana qədər davam edəcək”.

Firuzə Əliyeva
Sfera.az