19:T728,

Hazırda Azərbaycanda gecələr getdikcə uzanır, gündüzlər isə qısalır. Bu proses qış fəsli daxil olanadək davam edəcək.

Sfera.az xəbər verir ki, Günəş hər gün səhərlər bir az daha gec oyanır, axşamlar isə tələskən addımlarla yerini qaranlığa təhvil verir. Sanki təbiət də insanlar kimi yorulub, yavaş-yavaş yuxuya getməyə hazırlaşır. Bu günlərdə hər birimiz gecələrin uzandığını, gündüzlərin qısaldığını hiss edir, görürük. Bu, əsrlərdir davam edən, heç vaxt dəyişməyən, amma hər dəfə insanın ovqatına təsir edən bir təbiət möcüzəsidir.

Hazırda davam edən payız fəsli Azərbaycana 22 sentyabrda daxil olub. Payızın çıxmasına isə 22-23 gün qalır.

Bu il Azərbaycana qış fəsli dekabrın 21-i saat 19:03:01-da daxil olacaq, bununla da Şimal yarımkürəsində qış, Cənub yarımkürəsində isə yay fəsli başlayacaq. Bu barədə Elm və Təhsil Nazirliyi Nəsirəddin Tusi adına Şamaxı Astrofizika Rəsədxanasından verilən məlumatda bildirilib.

Dekabrın 21-də qış başlayan zaman Yerin fırlanma oxu Günəş istiqaməti ilə ən böyük bucaq əmələ gətirir və ya Günəş həmin gün günorta üfüqdən minimum hündürlükdə (26⁰.2) olur. Həmin gün ən qısa gündüz (gündüzün uzunluğu 9 saat 17 dəqiqə 22 saniyə) və ən uzun gecə (gecənin uzunluğu 14 saat 42 dəqiqə 38 saniyə) olur. Qış fəslinin uzunluğu 88 gün 23 saat 42 dəqiqə 52 saniyə təşkil edəcək.

Bu dəyişikliklərin hər biri həyatın ritmidir. Təbiət bizə hər il eyni dərsi verir...//modern.az

Azərbaycanda gecələr bu tarixədək UZANACAQ