Xalq arasında geniş yayılmış inanclardan birinə görə, may ayında toy etmək uğursuz sayılır. Bu səbəbdən bir çox cütlük məhz bu ayda toy mərasimindən çəkinir və şənliklərini daha çox yay və payız aylarına planlaşdırır.

Nəticədə, may ayında toyların sayında nəzərəçarpacaq azalma müşahidə olunur ki, bu da bazarda, xüsusilə şadlıq evləri, restoranlar və xidmət sektorunda müəyyən dəyişikliklərə səbəb olur.

May ayında toyların az keçirilməsi bazarda (şadlıq evləri, restoranlar, xidmət sektoru və s.) qiymətlərə və tələb-təklif balansına necə təsir göstərir? Bu, şadlıq evi qiymətlərinə təsir edirmi?

Sfera.az olaraq, mövzu ilə bağlı paytaxda yerləşən bir neçə şadlıq evi ilə əlaqə saxladıq. Onların verdiyi məlumata görə, may ayında tələbatın aşağı olması səbəbindən qiymətlərdə müəyyən endirimlər tətbiq olunur. Bəzi şadlıq evlərində adambaşı menyu qiymətləri digər aylarla müqayisədə 5-10 faiz daha ucuz təklif edilir. Həmçinin, müştəri cəlb etmək üçün bəzilərində canlı musiqi, dekorasiya və digər əlavə xidmətlərin pulsuz və ya daha sərfəli şərtlərlə təqdim olunduğu qeyd olunur.

Digər tərəfdən, bəzi məşhur və daimi müştəri bazasına malik restoranlarda qiymətlərin ciddi şəkildə dəyişmədiyi bildirilir. Bu cür məkanlarda sifarişlər əvvəlcədən tutulduğu üçün mövsümi azalma qiymət siyasətinə bir o qədər də təsir etmir. Bununla belə, ümumi bazar tendensiyası göstərir ki, may ayında toy etmək istəyənlər daha münasib qiymətlərlə xidmət əldə edə bilirlər.

Mövzu ilə bağlı Liberal İqtisadçılar Mərkəzinin sədri Akif Nəsirli Sfera.az-a açıqlama verib. Onun sözlərinə görə, xalq arasında “mayda toy olmur” fikri hələ də var və bu, bazara birbaşa təsir edir:

“May ayı toy mövsümünün başlanğıcı sayılsa da, çox adam inanclara görə həmin ayı keçir. Nəticədə şadlıq evləri, restoranlar və toyla bağlı xidmət sahələrində tələbat aprel və iyunla müqayisədə zəif olur. Amma bir faktoru nəzərə almaq lazımdır ki, məhərrəm ayı iyunun 15-də girir. Ona görə töy mövsümü bu yay qısa olacaq. Bu səbəbdən ən azı mayın ikinci və üçüncü ongünlüklətində toylar intensivləşə bilər. Tələbat az olanda şadlıq evləri boş qalmamaq üçün güzəştə gedir. May üçün menyu qiymətini 5-10 faiz aşağı salan, zalı bağlayanda əlavə “canlı musiqi pulsuzdur” deyən, dekorasiyanı hədiyyə edən yerlər çoxalır. İyun-sentyabr aylarında 60-80 manata olan adambaşı menyunu mayda 50-70 manata tapmaq olur. Xüsusilə həftəiçi günlərində endirim daha çox hiss olunur. Çünki şadlıq evinin əsas xərci işçi, işıq, qaz, icarədir. Zal boş qalsa da bu xərclər gedir. Ona görə sahibkarlar “az qazanc heç olmamaqdan yaxşıdır” prinsipi ilə qiymət endirir. Xidmət sektoru da eyni vəziyyətdədir. Fotoqraf, videoqraf, bəzək, maşın bəzəmə, aparıcı, rəqqas qrupları may ayı üçün sifariş az olanda qiyməti salır. 2000 manata işləyən aparıcı mayda 1500-ə razılaşa bilir. Çünki iyunda həftədə 3-4 toy tutursa, mayda 1 toy tapmaq da çətindir”.

Ekspert qeyd edib ki, bu endirim bütün bazara aid deyil:

“Şəhərin mərkəzində, adı çıxmış, “mövsümdən asılı olmayaraq dolu olan” şadlıq evləri qiymət endirmir. Onların müştərisi inanclara baxmır və əvvəlcədən tarix bağlayır. Ucuz və orta seqmentdə, yeni açılan zallarda isə may ayı “kampaniya ayı” olur. Tələb-təklif balansına gəldikdə, mayda təklif çox, tələb az olur. İyun-avqustda isə əksinədir. Tələb çox, boş zal tapmaq çətin olur. Buna görə də toy edənlər qiymət üstünlüyü qazanmaq üçün bilərəkdən mayı seçir. Xüsusilə böyük xərcdən qaçmaq istəyən ailələr üçün may sərfəli aydır. Qısası, “mayda toy olmur” düşüncəsi real bazar qanunu yaradıb. Tələbat düşür, şadlıq evləri və xidmət göstərənlər müştəri cəlb etmək üçün qiyməti endirir. İnanclara önəm verməyənlər üçün may ən ucuz toy ayı sayılır”.

Niyaz Hacıyev
Sfera.az

Mayda toy etmək daha ucuz başa gələcək - QİYMƏTLƏR