Hazırda respublikanın ümumtəhsil məktəblərində donuz qripi əleyhinə bir sıra tədbirlər görülür. 

“Qafqazinfo” xəbər verir ki, artıq bir sıra orta məktəblərdə virus əleyhinə aparatlar quraşdırılıb. 
Bununla bağlı açıqlama verən Səhiyyə Nazirliyinin mətbuat xidmətinin rəhbəri Liya Bayramova bildirib ki, tibb işçiləri məktəblərdə qripə yoluxmuş uşaqlardan qan nümunələri götürür: ”Həmin nümunələr daha sonra Taun Əleyhinə Stansiyanın laboratoriyasında yoxlanılacaq. Bundan əlavə, məktəbin girişində aparatlar da quraşdırılıb. Hələ ki, məktəblilər arasında bu virusa yoluxma halına rast gəlinməyib. Eyni zamanda dezinfeksya tədbirləri bağçalarda da həyata keçirilir”.

Gigiyena və Epidemiologiya Mərkəzinin şöbə müdiri Ziyəddin Kazımov da “Qafqazinfo”ya açıqlamasında qeyd edib ki, yanvar ayının 23-dən etibarən respublikanın iri şəhərlərində yəni Bakı, Gəncə, Sumqayıt, Mingəçevirdə yerləşən məktəbəqədər təhsil müəssisələrində və ümumtəhsil məktəblərində donuz qripi əleyhinə tədbirlər görülməsi barədə Səhiyyə Nazirliyi tərəfindən tapşırıq verilib: “Tətil vaxtı məktəblərdə dezinfeksiya işləri həyata keçirilib. Bağçalarda isə iş vaxtının sonuna yaxın bu tədbirlər görülür. Ümumilikdə, bu günə qədər 412 bağçada, 467 orta məktəbdə dezinfeksiya işləri həyata keçirilib. Tədbirlər bu gün də davam etdirilir. Məktəblərdə quraşdırlan aparatlar, avadanlıqlar bu günün tələblərinə cavab verir”.