Bricit Makron qadın olduğunu sübut edəcək - Məhkəmə iddiası qaldırıldı

Fransa Prezidenti Emmanuel Makronun həyat yoldaşı Bricit Makron, ABŞ-də sağçı influenser Kəndis Ovensın irəli sürdüyü “kişi kimi doğulub” iddiasına qarşı məhkəməyə elmi və fotoqrafik sübutlar təqdim edəcək.

Sfera.az “NTV”yə istinadən xəbər verir ki, məlumata görə, Makron ailəsinin vəkilləri Ovensa qarşı açılan təhqir iddiası çərçivəsində bu sənədləri məhkəməyə təqdim etməyi planlaşdırır. 

Ovensın vəkilləri isə işin rədd olunması üçün müraciət ediblər.

Makron ailəsinin vəkili Tom Klare “BBC”yə açıqlamasında, Bricit Makronun bu iddiaları “son dərəcə kədərli” hesab etdiyini və Emmanuel Makronun da vəziyyətdən təsirləndiyini bildirib. Onun sözlərinə görə, məhkəmədə ekspert rəyləri və elmi xarakterli sübutlar təqdim olunacaq.

Bricit Makronun hamiləlik dövrlərinə və uşaqlarını böyütdüyü zamanlara aid fotoşəkillərin də mövcud olduğu və lazım gəldiyi halda məhkəməyə təqdim ediləcəyi açıqlanıb.

Qeyd edək ki, Kəndis Ovens Bricit Makronun kişi olduğu iddiasını dəfələrlə gündəmə gətirib və 2024-cü ilin martında bu iddiaya “bütün peşəkar nüfuzunu qoyacağını” bəyan edib. İddia ilk dəfə 2021-ci ildə Fransalı bloqçular Amandine Roy və Nataşa Reyin “YouTube”da yayımladıqları videoda ortaya atılmışdı.
Makron ailəsi 2024-cü ildə Roy və Reyə qarşı Fransada açdığı təhqir iddiasını qazanmışdı. Lakin 2025-ci ildə apellyasiya məhkəməsi ifadə azadlığına istinad edərək həmin qərarı ləğv etmişdi. 

Hazırda Makron ailəsi bu qərardan şikayət verib.

Bəsti Rəfizadə 
Sfera.az