“Azərbaycan Dəmir Yolları” QSC-nin (ADY) Bakı-Pirşağı-Sumqayıt istiqaməti üzrə bazar günləri üçün açıqladığı qatar cədvəli sərnişinlər arasında ciddi narazılıq yaradıb. Yeni qrafikə əsasən, Bakıdan çıxan qatarlar səhər saat 10:10-dan sonra 16:40-da yenidən hərəkət edir. Bu isə təxminən 6 saatdan artıq fasilə deməkdir. Nəticədə günorta saatlarında, xüsusilə də həftəsonu mərkəzə getmək istəyən vətəndaşlar məcburən alternativ nəqliyyat vasitələrindən istifadə etməli olurlar. Sərnişinlər avtobusla 20 Yanvar istiqamətinə gedib, oradan isə əlavə nəqliyyatla yoluna davam etməyə məcbur qalırlar. Halbuki həftəsonları, xüsusilə bazar günü insanların ən aktiv hərəkət saatları məhz günorta vaxtlarına təsadüf edir.

Sərnişinlər bildirirlər ki, şəhərətrafı dəmir yolu nəqliyyatı rahatlıq və alternativsiz xidmət prinsipi ilə işləməli olduğu halda, bu cür uzun fasilələr ictimai nəqliyyatın funksionallığını ciddi şəkildə azaldır.

Bəs Bakı-Pirşağı-Sumqayıt marşrutu üzrə bazar günləri saat 10:10-dan sonra 16:40-a qədər qatar reyslərinin olmamasının səbəbi nədir və sərnişinlərin artan tələbatı nəzərə alınaraq bu vaxt aralığında əlavə reyslərin artırılması nə vaxt planlaşdırılır?

Mövzu ilə bağlı Sfera.az ADY-yə sorğu ünvanlayıb.

ADY-nin ictimaiyyətlə əlaqələr şöbəsinin müdiri Bəxtiyar Hacıyev bildirib ki, Abşeron dairəvi dəmir yolu marşrutu üzrə qatarların hərəkətinə günorta saatlarında verilən fasilə texniki baxımdan “pəncərə” adlanır.

Onun sözlərinə görə, texniki pəncərə zamanı bütünlükdə dəmir yolu infrastrukturu yoxlanılır:

“Buraya rabitə və işarəvermə qurğuları, relslər və onların müxtəlif komponentləri daxildir. Eyni zamanda, elektrik təchizatı yoxlanılır. Bildiyiniz kimi, Abşeron dairəvi dəmir yolunda qatarlar elektrik enerjisi ilə işləyir. Bundan başqa, davamlı olaraq qatarlara texniki baxış keçirilir. Yəni təkcə dəmir yolu infrastrukturu deyil, həm də qatarların texniki vəziyyəti yoxlanılır.

İş günləri günorta saatlarında qatarla səfərlərə tələbat azaldığı üçün texniki pəncərə məhz bu vaxtlara salınır. Nəzərə alaq ki, şənbə və bazar günləri də qatarlara tələbat nisbətən aşağı olur.

Texniki pəncərənin verilməsi praktikası uzun illərdir mövcuddur. Bu tədbirlər infrastrukturun və qatarların saz vəziyyətdə saxlanması, nəticə etibarilə sərnişinlərin mənzil başına vaxtında, rahat və təhlükəsiz çatdırılması məqsədilə görülür”.

B.Hacıyev reys sayının artırılması ehtimalına da münasibət bildirib:

“ADY Abşeron dairəvi marşrutu üzrə reyslərin artırılması, qrafikin optimallaşdırılması məqsədilə davamlı iş aparır. Ötən il aprelin 15-də reyslərin sayı iş günləri 66-dan 92-yə çatdırılmışdı, sentyabrda isə bu rəqəm 103-ı çatdırıldı. Qatarlardan birinin zəruri və planlı təmirə verilməsi ilə əlaqədar olaraq, hazırda reyslərin sayı 96-dır”.

Firuzə Əliyeva
Sfera.az

Sərnişinlər narazıdır: Qatar reysləri niyə azaldılıb? - AÇIQLAMA