Ölüm virusu Azərbaycan sərhədlərində - Bu şəxslər TƏHLÜKƏDƏDİR

Son zamanlar Azərbaycanın həmsərhəd ölkələrdə Krım-Konqo hemorragik qızdırma xəstəliyi ilə bağlı epidemioloji vəziyyət gərginləşib. Bunu nəzərə alaraq səhiyyə naziri Oqtay Şirəliyev "Krım-Konqo hemorragik qızdırma xəstəliyinə qarşı profilaktik tədbirlərin gücləndirilməsi barədə” əmr imzalayıb. Əmrdə profilaktik tədbirlərin gücləndirilməsi tapşırılıb.

Xəstəliyin ölkəmizdə yayılma ehtimalının nə qədər yüksək olmasına Səhiyyə Nazirliyi Respublika Taun Əleyhinə Stansiyanın Xüsusi təhlükəli yoluxucu xəstəliklərin epidemiologiyası şöbəsinin müdiri Rita İsmayılova Publika.az-a açıqlamasında aydınlıq gətirib.

R.İsmayılova xəstəliyin ilk dəfə 1944-cü ildə Qərbi Krımda, 1969-cu ildə isə Konqoda qeydiyyata alındığını deyib:

"Epidemoloji təhlil hər iki bölgədə yayılan xəstəliyin eyni əlamətlərinin olduğunu müəyyən etməyə imkan verib. Xəstəliyin adı da məhz buradan qaynaqlanır. Həmçinin, xəstəlik qızdırma ilə müşahidə edildiyindən, ona Krım-Konqo hemorragik qızdırma adı verilib. Bu virus mənşəli qanaxmalarla müşahidə edilən xəstəlikdir. İnsanlar bu xəstəliyə gənə dişləməsi, yoluxmuş heyvanların qanı və digər bioloji maddələrlə sıx təmas nəticəsində yoluxa bilərlər. Gənələr əvvəl heyvanları dişləyərək, virusa yoluxur, sonra isə insanları dişləyərək onları da yoluxdururlar”.

R.İsmayılova əsasən ferma sahibləri, qəssablar və çobanların risk qrupunda olduğunu deyib: "Həmçinin meşələrdə, sahələrdə olanlar da gənələrlə kontakta ola biləcəyinə görə risk altındadırlar. Xəstəlikdən ölüm əmsalı 40 faizə qədərdir. Bu çox da böyük faiz hesab edilmir. Xəstəliyə qarşı peyvənd yoxdur, müalicəsi isə simptomatikdir. Yəni hansı əlamətlər müşahidə olunursa, ona qarşı da müalicə aparılır”.

Şöbə müdiri deyir ki, xəstəliyin inkubasiya dövrü 7-14 gün arasındadır:

"Orta hesabla 7 gün sonra artıq əlamətlər özünü büruzə verir. 39-40 dərəcə qızdırma, baş ağrıları, üşütmə, üz nayihələrində, selikli qişada qızartdı, əzələlərdə, oynaqlarda ağrı, ürəkbulanma və qusma ilə müşahidə edilir. Bunlar ümumi simptomlardır. Bir neçə gün sonra qanaxmalar başlayır. Əsasən, diş nayihəsində qanaxma müşahidə edilir, sonra qarında, qaraciyərdə ağrılar olur, hətta sarılıqla da müşahidə edilir. Qanaxmalardan sonra damar daxili laxtalanma, şok və ölüm baş verə bilir. Tez müalicə olunduğu halda xəstəlikdən sağalma mümkündür. Lakin Azərbaycanda bu xəstəlik heç zaman yayılmayıb. Son 50 ilə baxdım bir dəfə də belə hal qeydə alınmayıb. Amma qonşu ölkələrdə bu xəstəlik tez-tez müşahidə edilir. Nazir Oqtay Şirəliyev tərəfindən imzalanan əmr də məhz qonşu ölkələrdəki yayılma əsas tutularaq həyata keçirilib. Hazırda virus ən çox İranda yayılıb. Orada artıq alovlanmalar qeyd olunur”.