İran Atom Enerjisi Təşkilatının (İAT) sədri Məhəmməd İslami Beynəlxalq Atom Enerjisi Agentliyinə (UAEA) ABŞ və İsrailin zərbələrinə məruz qalmış nüvə obyektlərində yoxlama aparılması üçün icazə verilməyəcəyini bildirib.

Sfera.az xəbər verir ki, “İranlı Tələbələr Xəbər Agentliyi”nin (ISNA) məlumatına görə, İslami UAEA-nın İrandakı fəaliyyəti ilə bağlı açıqlamasında yalnız hücuma məruz qalmayan obyektlərdə yoxlamalara icazə verildiyini deyib.

Onun sözlərinə görə, zərbə alan obyektlərin yoxlanılması üçün xüsusi protokol olmalıdır və belə bir çərçivə olmadan Agentliyin yoxlama aparmaq hüququ yoxdur.

İslami UAEA-nın İsrail və ABŞ-nin İranın nüvə obyektlərinə hücumlarını pisləmədiyini xatırladaraq, bu mövqedə olan qurumun həmin obyektlərdə yoxlama tələb etməsinin əsassız olduğunu bildirib.

“Nə hücumları qınayan, nə də belə hallar üçün konkret təlimata malik olan Agentliyin bu mərkəzlərdə yoxlama istəmək haqqı yoxdur”, – deyə o vurğulayıb. İAT sədri UAEA-nın baş direktoru Rafael Qrossinin dünya ictimaiyyəti qarşısında hesabat verməli olduğunu da qeyd edib. İslami bildirib ki, İranın nüvə obyektləri Agentliyin nəzarəti altında olduğu halda bu hücumlara münasibət bildirilməməsi ciddi suallar doğurub.

UAEA-nın baş direktoru Rafael Qrossi isə daha əvvəl İranla bağlı yoxlanışların qismən bərpa edildiyini, lakin əsas nüvə obyektlərinə- Natanz, İsfahan və Fordoya hələ də giriş əldə olunmadığını açıqlamışdı.

Onun sözlərinə görə, bu obyektlərdə xeyli miqdarda nüvə materialı və avadanlıq mövcuddur və Agentlik həmin məkanlara qayıtmalıdır.

Qeyd edək ki, İsrail 13 iyun tarixində İranın müxtəlif şəhərlərində yerləşən nüvə obyektlərinə və ordunun yüksək rütbəli rəhbərliyinə qarşı genişmiqyaslı hücumlar həyata keçirib. “12 günlük müharibə” zamanı İranın Baş Qərargah rəisi, İnqilab Keşikçiləri Korpusunun baş komandanı, bir sıra yüksək rütbəli hərbçilər və 9 nüvə alimi həlak olub.

İsrailə açıq dəstək verən ABŞ 22 iyunda Natanz, Fordo və İsfahandakı üç nüvə obyektinə zərbələr endirib. İran isə 23 iyunda cavab olaraq ABŞ-nin Qətərdə yerləşən “Əl-Udeyd” hava bazasını hədəfə alıb. ABŞ Prezidenti Donald Tramp 24 iyunda İran və İsrail arasında atəşkəs əldə olunduğunu bəyan edib.

Bəsti Rəfizadə

Sfera.az

Məhəmməd İslami: "Buna icazə verilməyəcək"