Qurban bayramı dünyanın müxtəlif ölkələrində milyonlarla müsəlman tərəfindən böyük coşqu ilə qeyd olunur. Bayram günlərində qurbanlıq heyvanlar kəsilir, ətlər ehtiyacı olan ailələr arasında bölüşdürülür, insanlar yaxınlarını ziyarət edir və xeyriyyəçilik ənənələri daha da güclənir. Azərbaycanda da Qurban bayramı dövlət səviyyəsində rəsmi bayram kimi qeyd edilən mühüm dini günlərdən biridir.

Sfera.az bildirir ki, müsəlman dünyasının ən əlamətdar dini günlərindən biri olan Qurban bayramı hər il hicri təqvimi ilə zilhiccə ayının 10-cu günündə qeyd olunur. Tarixi minilliklər əvvələ gedib çıxan bu bayramın əsasında İbrahim peyğəmbərlə bağlı məşhur dini rəvayət dayanır. Dini mənbələrə əsasən, Allah İbrahim peyğəmbəri böyük bir sınaq qarşısında qoyaraq ona ən əziz varlığı olan oğlu İsmayılı qurban verməyi əmr edib. Rəvayətə görə, İbrahim peyğəmbər bu əmri yerinə yetirməyə hazır olduğu anda Allah tərəfindən ona bir qoç göndərilib və İsmayılın əvəzinə həmin heyvan qurban kəsilib. İslam dünyasında Qurban bayramının yaranması da məhz bu hadisə ilə əlaqələndirilir.

Bununla yanaşı bildirilir ki, qurbanvermə ənənəsi İslamdan əvvəlki dövrlərdə də müxtəlif xalqlar və inanclarda mövcud olub. Qədim icmalarda insanlar Tanrıya yaxınlaşmaq, sədaqətlərini göstərmək və bağışlanma diləmək üçün qurban mərasimləri keçirirdilər. İslam dini isə bu anlayışı daha fərqli məzmunda təqdim edərək onu mərhəmət, paylaşma və sosial həmrəylik simvoluna çevirib.

Tarixi mənbələrdə isə, hicrətin ikinci ilindən sonra Qurban bayramı müsəlman cəmiyyətində rəsmi dini ibadət kimi formalaşmağa başlayıb. Həmin dövrdən etibarən qurban kəsmək yalnız dini ayin deyil, eyni zamanda aztəminatlı insanlara yardım etmək və cəmiyyətdə birlik ruhunu gücləndirmək vasitəsi kimi qəbul edilib. Qurani-Kərimdə də qurban ibadətinin əsas mahiyyətinin insanın niyyəti və Allaha bağlılığı olduğu vurğulanır. İslam alimləri bildirirlər ki, burada əsas məsələ qurbanın özü deyil, insanın səmimiyyəti, itaəti və paylaşmaq istəyidir.

Fidan Hacızadə Sfera.az

Qurban bayramının yaranma tarixi: Minilliklərdən bu günə uzanan müqəddəs ənənə