Fransanın Tuluza şəhərində inanılmaz və təhlükəli hadisə yaşanıb. Bir xəstə bədənində Birinci Dünya Müharibəsinə aid artilleriya mərmisi ilə xəstəxanaya müraciət edib. Partlama riski səbəbilə təcili yardım şöbəsi dərhal boşaldılıb və bomba zərərsizləşdirmə mütəxəssisləri hadisə yerinə cəlb olunub.

Sfera.az bildirir ki, hadisə ötən çərşənbə axşamı Tuluza şəhərində yerləşən Rangueil Universitet Xəstəxanasında baş verib. Film ssenarisini xatırladan bu ekstremal vəziyyət xəstəxanada qısa müddətli panikaya səbəb olub.

Təcili yardım şöbəsinə müraciət edən kişinin düz bağırsağında təxminən 20 santimetr uzunluğunda və 5 santimetr diametrində, Birinci Dünya Müharibəsinə aid artilleriya mərmisinin ilişib qaldığı müəyyən edilib. Qeyri-adi tibbi vəziyyət və mərminin potensial partlama təhlükəsi nəzərə alınaraq xəstəxana rəhbərliyi dərhal yüksək təhlükəsizlik protokollarını tətbiq edib.

Təhlükəsizlik tədbirləri çərçivəsində təcili yardım şöbəsinin böyük hissəsi boşaldılıb, yeni xəstələrin qəbulu isə müvəqqəti olaraq dayandırılıb. Hadisə yerinə cəlb olunan yanğınsöndürmə briqadalarına dəstək məqsədilə Bayonne şəhərindən xüsusi bomba zərərsizləşdirmə qrupları çağırılıb.

Mütəxəssislər tərəfindən aparılan ətraflı yoxlamadan sonra məlum olub ki, mərminin içindəki partlayıcı mexanizm çıxarılıb və real partlama riski mövcud deyil. Bu məlumatdan sonra xəstəxanadakı ilkin panika aradan qalxıb və əməliyyata hazırlıq başlanıb.

Həyati təhlükənin olmadığı təsdiqləndikdən sonra xəstə cərrahi əməliyyata alınıb və artilleriya mərmisi bədənindən uğurla çıxarılıb. Xəstəxana rəhbərliyi xəstənin vəziyyətinin stabil olduğunu və sağalma prosesinin davam etdiyini açıqlayıb.

Qeyd edək ki, oxşar nadir hadisə bu yaxınlarda Fransanın Toulon şəhərində 88 yaşlı bir xəstədə də qeydə alınıb.

Aynil

Xəstəyə görə bomba zərərsizləşdirmə qrupları çağırıldı