"Tanınmaz halda idi, ailəsi nişan üzüyündən tanıdı..."

"Bəlkə bu gün getməyəsiz? Hələ yaraları təzədir, sizi görüb daha da pis olarlar”.

Biz Sumqayıt Dövlət Universitetinə çatanda mühafizəçilərlə tanımadığımız bir şəxs arasında bu dioloq gedirdi. Sonradan bildik ki, həmin adam dünən qəzaya səbəb olan mikroavtobusun sürücüsünün qohumudur və ölən tələbələrin yas yerlərinin dəqiq ünvanını öyrənməyə gəlib. Sən demə, qəzadan sonra həbs olunan sürücünün ailəsi ölən tələbələrin yas mərasimlərinə getmək istəyir.

"Qafqazinfo” olaraq bizim universitetə getməyimizdə əsas məqsəd tələbələr haqda onların qrup yoldaşlarından, müəllimlərindən xoş xatirələr eşitmək olsa da, buna nail ola bilmədik. Təəssüf ki, söhbətləşə bildiyimiz yeganə şəxs elə bizi qarşılayan mühafizə xidmətinin rəhbəri Ədalət bəy oldu. O bildirdi ki, hazırda rektorluq, müəllim heyəti və tələbələr yas mərasimlərindədir.

Buna səbəb gətirən mühafizəçi bizim universitetə daxil olmağımıza da icazə olmadığını bildirdi. Əvəzində qısa da olsa onunla söhbətləşə bildik:

"Hər gün üzlərini gördüyümüz tələbələr idi. Çinarə həmişə gecikirdi. Gülə-gülə vəsiqəsini göstərib tez keçirdi. Qəzadan sonra bir neçə nəfər qəzaya düşənlərin telefon və çantalarını gətirmişdi. Hamısını sahibinə verdik. Bir telefon qalıb, onu da tez-tez elektrikə qoşuruq ki, sönməsin. Birdən sahibi narahat olar. Roza nişanlı idi. Oturacaqlar arasında qaldığı üçün tanınmaz hala düşüb. Ailəsi qızını elə o nişan üzüyündən tanıyıb”.

Sosial şəbəkələrdə hətta Rozanın atasının qızının ölüm xəbərini eşitdikdən sonra infarkt keçirdiyi deyilirdi. Ancaq universitetdən bildirdilər ki, bu, yanlış informasiyadır.