"Ölkə Prezidenti İlham Əliyevin yeni təyin olunan icra başçıları ilə görüşündə səsləndirdiyi mesajlar dövlət idarəçiliyində yeni mərhələnin konturlarını müəyyənləşdirərək bütün istiqamətləri artan templə yekun məqsədə – mərkəzi hədəfi insan, onun hüquqlarının təminatı olan icma, o cümlədən ailə məsələləri, qadın və uşaqların mənafeyinə xidmət edən yerli idarəetmə modelinin qurulmasına yönəldir".

Sfera.az xəbər verir ki, bu fikirləri açıqlamasında Ailə,Qadın və Uşaq Problemləri üzrə Dövlət Komitəsinin sədri Bahar Muradova bildirib.

Onun sözlərinə görə, Prezidentin xalqa xidmət, şəffaflıq, məsuliyyət və təvazökarlıqla bağlı tapşırıqları yerli səviyyədə icra hakimiyyətlərinin fəaliyyətinə yeni nəfəs gətirir və sosial sahədə daha çevik, daha dəqiq koordinasiya olunan iş mexanizmlərinin formalaşdırılmasını tələb edir: "Bu yanaşma şaquli və üfüqi resursların əlaqələndirilmiş şəkildə tətbiqi ilə icmaların sosial maraqlarının təmin olunmasını hədəfləyir.

Beləliklə həm dövlət strukturları arasında, həm də icra hakimiyyətləri ilə vətəndaş cəmiyyəti institutları, yerli ictimai birliklər, sosial xidmət təşkilatları arasında əməkdaşlıq mədəniyyətinin gücləndirilməsi aktuallaşır.

Prezidentin vurğuladığı şəffaflıq və nəticəyönümlülük prinsipləri ailə və uşaq rifahı sahəsində xidmətlərin əlçatanlığının artırılması, gender əsaslı ayrıseçkiliyin aradan qaldırılması, bərabər iştirakçılığa yol açan proqramların icrası vasitəsilə risk qruplarına erkən müdaxilə və sosial dəstək mexanizmlərinin təkmilləşdirilməsi kimi sahələrdə daha peşəkar və sistemli yanaşmaları zəruri edir".

Bahar Muradova vurğulayıb ki, yerli icra orqanlarının üzərinə düşən əsas vəzifələrdən birinin regional inkişaf proqramlarının sosial istiqamətlərdə daha səmərəli tətbiqi, qadınların məşğulluğu, uşaqların təhsili və sağlamlığı üçün yaradılan imkanların genişləndirilməsi, yeni sosial layihələrin təşkili və mövcud təşəbbüslərin gücləndirilməsidir:

"Bu, yerli səviyyədə sosial infrastrukturların – uşaq və qadın mərkəzlərinin, ictimai dəstək xidmətlərinin, psixoloji və hüquqi yardım mexanizmlərinin – daha funksional şəkildə fəaliyyət göstərməsini tələb edir.

Cənab Prezidentin “xalqa yaxın olma, vətəndaşa münasibətdə prinsipiallıq və həssaslıq” kimi çağırışları icra hakimiyyətləri üçün administrativ tələb olmaqla yanaşı, həm də sosial məsuliyyət modelinə geniş yol acır.

Xüsusilə ailə və uşaq məsələlərində məmur davranışının humanist, çevik və operativ olması, problemlərin birbaşa həyat tərzinə təsir vasitəsilə həllinin təmin edilməsini aktuallaşdırır. Bu çərçivədə yeni təyinatlar və onların qarşısında qoyulan vəzifələr dövlətin sosial sahədə güclü və dayanıqlı icma əsaslı idarəetmə modelinə keçid niyyətini gücləndirir.

Nəticədə Prezidentin görüşdə səsləndirdiyi mesajlar həm dövlət idarəçiliyinin yenilənməsi, həm də ailə rifahının prioritet sosial xətt kimi möhkəmləndirilməsi üçün strateji çərçivə yaradır.

Şaquli və üfüqi koordinasiyanın gücləndirilməsi ilə yerli icra orqanlarının sosial layihələri daha səmərəli tətbiq etməsi, resursları daha düzgün bölüşdürməsi və ən əsası, hər idarəetmə addımını insanın rifahına yönəltməsi qarşıdakı dövrün əsas hədəflərindən biri kimi formalaşır.

Bu yanaşma ölkənin bütün bölgələrində dayanıqlı, inklüziv və insan mərkəzli icmaların qurulmasına xidmət edən yeni inkişaf mərhələsinin əsasını qoyur".

Bahar Muradova: Dövlət idarəçiliyinin yenilənməsi strateji çərçivə yaradır