ABŞ Prezidenti Donald Tramp amerikalı sahibkar və dünyanın ən varlı adamı İlon Maskı “80 faiz super dahi” adlandırarsa da, onun belə, səhv etməyə meyilli olduğunu bildirib.

Sfera.az xəbər verir ki, bu barədə “TASS” informasiya agentliyi məlumat yayıb.

“İlon əladır”,– deyə Amerika lideri Florida ştatının Vest Palm Biç şəhərindən Vaşinqtona uçarkən jurnalistlərə açıqlamasında bildirib. Tramp Milad və Yeni il tətillərini Mar-a-Laqo malikanəsində keçirib. Prezident bir neçə ay əvvəl Maskla aralarındakı fikir ayrılıqlarının həll olunub-olunmadığı ilə bağlı suala cavab verərək deyib: “Mən İlon haqqında belə deyirəm: o, 80 faiz super dahidir, digər 20 faiz isə səhv edir. Amma o, yaxşı adamdır, yaxşı niyyətlidir”,– deyə Amerika administrasiyasının rəhbəri əlavə edib. Qeyd edək ki, 2025-ci ildə İlon Mask ABŞ Hökumət Səmərəliliyi Departamentinin (DOGE) koordinatoru və xüsusi təyin olunmuş işçi vəzifəsində çalışıb və faktiki olaraq Trampın yaxın çevrəsinin üzvü olub.

Lakin Amerika mediasının məlumatına görə, prezidentlə iş adamı arasındakı münasibətlər bir sıra səbəblərə, o cümlədən Maskın biznes maraqlarına görə pərdəarxası şəkildə pisləşməyə başlayıb. Maskın dövlət qulluğundan getməsindən sonra tərəflər iyunun 5-də sosial mediada açıq qarşıdurmaya giriblər. Mask iddia edib ki, Tramp onun dəstəyi olmadan 2024-cü ilin noyabr seçkilərində qalib gələ bilməzdi, yeni impiçment cəhdi ideyasını dəstəkləyib, Ağ Ev tərəfindən maliyyələşdirilən əsas xərclər qanun layihəsini və prezidentin idxal tariflərini tənqid edib, həmçinin ABŞ iqtisadiyyatı üçün tənəzzül proqnozlaşdırıb.

Tramp isə cavab olaraq Maskı “dəli” adlandırıb və onun DOGE-yə rəhbərlik etdiyi dövrdə bir anda vəzifələrini vicdanla yerinə yetirməyi dayandırdığını iddia edib. Prezident həmçinin Maskın şirkətləri, o cümlədən “SpaceX” ilə bağlanmış hökumət müqavilələrinin ləğvi ilə hədələyib. Daha sonra Mask Tramp haqqında sərt açıqlamalarına görə peşman olduğunu bildirib. Amerika mediasının məlumatına görə, son günlərdə Mask Mar-a-Laqo malikanəsini ziyarət edib və Trampla görüşlər keçirib.

Niyaz Hacıyev

Sfera.az

Tramp:"Mask səhv etməyə meyillidir"