Son günlər sosial şəbəkələrdə azyaşlılarda antibiotik qəbulundan sonra şok vəziyyətlərin artdığı ilə bağlı xəbərlər yayılıb. Bu, valideynlər arasında narahatlıq yaradıb və müzakirələrə səbəb olub.

Səhiyyə Nazirliyinin mətbuat xidmətindən Bizim.Media-ya bildirilib ki, antibiotiklərin, antibakterial preparatların tətbiqi Azərbaycan qanunvericiliyi ilə ciddi şəkildə tənzimlənir:

““Dərman vasitələri haqqında” Qanuna əsasən bu dərmanlar yalnız reseptlə buraxılır və həkim təyinatları elektron resept sistemi üzərindən rəsmiləşdirilməlidir. “Əhalinin sağlamlığının qorunması haqqında” Qanun həkimə yalnız tibbi göstəriş olduqda müalicə təyin etməyə icazə verir. Bu səbəbdən uşaqlara hər hansı dərmanın, o cümlədən antibiotiklərin köçürülməsi yalnız tibbi göstəriş əsasında mümkündür. Müalicə prosesi istisnasız olaraq Səhiyyə Nazirliyi tərəfindən təsdiq olunmuş klinik protokollar əsasında aparılmalıdır”.

Qurum bildirib ki, klinik protokollarda uşaqlarda antibiotik istifadəsinin bütün meyarları, nə zaman, hansı dozada və hansı müddətdə təyin olunmalı olduğu aydın şəkildə müəyyən edilib.

Nazirlik həmçinin qeyd edib ki, bəzi ölkələrdə antibiotiklərin uşaqlara qadağan edilməsi barədə yayılan fikirlər reallığı əks etdirmir:

“ABŞ, Avropa Birliyi, Böyük Britaniya kimi ölkələrdə də antibiotiklər yalnız ciddi tibbi göstəriş olduqda tətbiq edilir və bu praktika Azərbaycanda da tam şəkildə mövcuddur.

Ölkədə antibiotiklərin səmərəli istifadəsi ilə bağlı maarifləndirmə tədbirləri davamlı olaraq həyata keçirilir. Hər il Ümumdünya Səhiyyə Təşkilatının təşəbbüsü ilə “Antibiotiklərdən səmərəli istifadə Həftəsi” keçirilir, əhali arasında maarifləndirici materiallar paylanır, tibb işçiləri üçün seminarlar təşkil edilir. Həmçinin müxtəlif illərdə metro və avtobuslarda xüsusi məlumatlandırıcı posterlər yerləşdirilib”.

Nazirlik vətəndaşlara müraciət edərək antibiotiklərin yalnız həkim təyinatı ilə qəbul edilməsinin vacibliyini xatırladıb və uşaqlara özbaşına dərman verilməsinin ciddi fəsadlara yol aça biləcəyini bildirib.

Uşaqlarda antibiotik istifadəsi ilə bağlı xəbərdarlıq - Nazirlikdən açıqlama