Hindistanın Azərbaycandakı səfiri Abhay Kumar mayın 10-da Azərbaycanın Şabran şəhərində yerləşən Ayurveda Mərkəzini ziyarət edib.

Sfera.az bildirir ki, səfər çərçivəsində o, mərkəzdə çalışan hindistanlı ayurveda həkimləri, terapevtlər və aşpazlarla görüşüb. Səfir heyətlə söhbət edərək onların Azərbaycanda holistik sağlamlıq və ənənəvi hind təbabətinin təşviqi istiqamətində gördükləri işi yüksək qiymətləndirib.

Səfir Kumar həmçinin mərkəzin rəhbəri Teymur Hacıbəyov ilə Azərbaycanda Ayurveda sahəsində maarifləndirmə, təlim və ictimai təşəbbüslərin genişləndirilməsi üzrə əməkdaşlıq imkanlarını müzakirə edib. Görüş zamanı sağlamlıq turizmi, mədəni mübadilə və ənənəvi tibb sahəsində əməkdaşlıq vasitəsilə insanlararası əlaqələrin gücləndirilməsi məsələlərinə də toxunulub.

Beş min ildən artıq tarixə malik və mənşəyi Hindistana gedib çıxan Ayurveda dünyanın ən qədim holistik müalicə sistemlərindən biridir. Bu sistem bədən, ağıl və ruh balansı vasitəsilə xəstəliklərin qarşısının alınmasına əsaslanan sağlamlıq yanaşmasını təşviq edir. Təbii və profilaktik prinsipləri ilə dünyada tanınan Ayurveda balanslı qidalanma, bitki mənşəli müalicələr, yoqa, meditasiya, detoks terapiyaları və ümumi rifahı qorumağa yönəlmiş həyat tərzi vərdişlərini ön plana çıxarır.

Son illərdə Ayurveda təbii və dayanıqlı sağlamlıq yanaşmalarına maraq göstərən insanlar arasında beynəlxalq səviyyədə daha çox tanınmağa başlayıb. Şabrandakı Ayurveda Mərkəzi Azərbaycanda autentik Ayurveda sağlamlıq praktikasını təqdim edən ilk mərkəzdir və ölkədə, eləcə də regionda hind ənənəvi sağlamlıq sistemlərinin tanıdılması baxımından mühüm platforma hesab olunur.

Mərkəz Azərbaycanın böyük turizm və sağlamlıq komplekslərindən biri olan Shabran Wellbeing Resort ərazisində yerləşir. Kompleks 2022-ci ilin dekabr ayında Azərbaycan Respublikasının Prezidenti İlham Əliyev, Birinci vitse-prezident Mehriban Aliyeva və ailə üzvlərinin iştirakı ilə rəsmi şəkildə açılıb. Mərkəz ölkənin turizm infrastrukturunda mühüm mərhələ hesab olunur və Azərbaycanın inteqrasiya olunmuş sağlamlıq və wellness turizminin inkişafına artan diqqətini əks etdirir.

Ayurveda tarixən Azərbaycana məxsus olmasa da, onun Şabranda tətbiqi ölkənin İpək Yolu üzərində müxtəlif mədəniyyətlərin, elmi biliklərin və müalicə ənənələrinin qovuşduğu məkan kimi tarixi roluna uyğun gəlir. Bu baxımdan, Ayurveda Mərkəzinin yaradılması sağlamlıq və rifah sahəsində müasir mədəni əməkdaşlığın davamı kimi qiymətləndirilir.

Səfər Hindistan və Azərbaycan arasında mədəni və sağlamlıq sahəsində əməkdaşlığın inkişaf etdiyini nümayiş etdirib və səhiyyə, ənənəvi bilik sistemləri və holistik rifah sahələrində birgə fəaliyyətə olan qarşılıqlı marağı vurğulayıb.

Hindistanın Azərbaycandakı səfiri Ayurveda Mərkəzini ziyarət edib - FOTO