Bu gün Beynəlxalq İşıqfor Günüdür

Bu gün - 5 Avqust Beynəlxalq İşıqfor Günü kimi qeyd olunur.

Sfera.az xəbər verir ki, bu günün tarixi 1914-cü il avqustun 5-də baş vermiş bir hadisə ilə əlaqədardır. Belə ki, həmin gün ABŞ-nin Klivlend şəhərində müasir işıqfor qurğularının ilk əcdadı meydana gəlib. O, qırmızı və yaşıl fənərlərə malik idi və işıqlar dəyişən zaman səs siqnalı işə düşürdü.

Əslində, ilk işıqforu hələ XIX əsrdə britaniyalı Cey Nayt icad edib. Bu qurğu 1868-ci ildə Londonda parlament binası qarşısında quraşdırılıb. Lakin üç ildən sonra onun fənəri partlayıb və polis işçisini yaralayıb. Bu hadisədən sonra işıqfor demək olar ki, 50 il unudulub.

1910-cu ildə ilk ikirəngli fənərə malik avtomat işıqfor qurğusu hazırlanıb və patentləşdirilib. Müasir işqforlara bənzər üçrəngli qurğuları isə ilk dəfə 1920-ci ildə Detroyt və Nyu-York sakinləri görüb. Zaman keçdikcə işıqforlar Amerikanın və Avropanın bir çox şəhərlərində populyarlıq qazanıb.

Qeyd edək ki, 2010-cu ildə Rusiyanın Perm şəhərində işıqfora abidə də qoyulub.

Firuzə Əliyeva