Dünyanın ən hündür və ən uzunömürlü ağacları kimi tanınan nəhəng sekvoyalardan biri təxminən 80 il əvvəl boşaldılıb mini evə çevrilmişdi. Tam 980 illik bu nəhəng gövdə, Viskonsindən olan bir sahibkar sayəsində turistləri magistral yolun kənarında qarşılayacağı günü gözləyir.

Sfera.az bildirir ki, dünyada nadir hallarda rast gəlinən təkrar emal və tarix hekayəsi ABŞ-ın Viskonsin ştatının Port Vaşinqton şəhərində nümayiş olunur.

980 illik sekvoya ağacının nəhəng gövdəsini oymaqla tikilmiş bu taxta daxma həm valehedici bir sənət əsəri, həm də yaşayış sahəsi baxımından mühəndislik möcüzəsi təqdim edir.

2022-ci ildə bu qeyri-adi tikilini hərracda satın alan Dev Abdull bütün sərmayəsini bu layihəyə yatırdığını deyir.

Dəqiq alış qiymətini açıqlamasa da, Abdull deyir: "Düzünü desəm, bu parçanı xilas etmək üçün pensiya hesabımdakı bütün pulları boşaltmağa hazır idim."

Onun məqsədi bu evi kommersiya müəssisəsinə çevirmək deyil.

Layihəni tamamilə sosial məsuliyyət və turizm təşəbbüsü kimi görən Abdull, motivasiyasını bu sözlərlə ümumiləşdirir:

"Viskonsində nəhəng sekvoya ağaclarını görmək istəyən, lakin Kaliforniyadakı milli parklara getmək imkanı olmayan minlərlə insan var. Ona görə də düşündüm ki, ora gedə bilmədikləri üçün milli parkı Viskonsin xalqına gətirəcəyəm."

1940-cı illərdə tikilmiş bu nəhəng taxta daxmanın uzunluğu təxminən 9 metr, eni 2,4 metr, divarları 30 santimetr qalınlığındadır.

Yaşayış sahəsi deyil, muzey/sərgi sahəsi kimi dizayn edilmiş daxmanın içi kompakt otel otağı kimi təchiz olunub. Nəhəng strukturun içərisində yemək sahəsi, mətbəx, iki çarpayı, rahat oturma sahəsi və hətta funksional vanna otağı var.

Sahibkar Deyv Abdull bu tarixi əsəri tapıb 43 nömrəli magistral yolun kənarına köçürməyi hədəfləyir. Səyahət edən ailələrin və maraqlı izləyicilərin dayanıb araşdıra biləcəyi yol kənarında bir cazibə yaratmaq istəyən Abdull, nəhəng layihəsi haqqında deyir:

“İnsanlar bu minilliklər boyu davam edən təbii tarixi və sənət əsərini cəmi 1 dollar simvolik ödəniş müqabilində öz gözləri ilə görə biləcəklər."

Hazırda çatışmayan yeganə şey magistral yol boyunca bu nəhəng taxtanı yerləşdirmək üçün uyğun torpaq sahəsi tapmaqdır. Abdull layihəni həyata keçirmək və dəstək toplamaq üçün işə başlayıb. Şimali Kaliforniya sahillərinə xas olan bu nəhəng təbii möcüzə, Viskonsin şossesində səyahət edənlərin yeni sevimlisinə çevrilməyə hazırdır.

Aynil

980 illik nəhəng ağacın içərisində ev tikdilər