19:T6bc,

Dünyada hər il milyonlarla uşaq qarşısı alına bilən xəstəliklər səbəbindən həyatını itirir.

Sfera.az xəbər verir ki, xüsusilə 5 yaşadək uşaqlar arasında ölüm hallarının əsas səbəbləri hələ də infeksion xəstəliklərdir.

BMT-nin Uşaq Fondu (UNICEF) və Ümumdünya Səhiyyə Təşkilatının (ÜST) məlumatına görə, pnevmoniya uşaqlar arasında ən ölümcül xəstəlik hesab olunur. Bu xəstəlik hər il dünyada 700-800 minə yaxın 5 yaşadək uşağın ölümünə səbəb olur.

Araşdırmalara görə, ishal xəstəlikləri uşaqlar arasında ölümün ikinci əsas səbəblərindən biridir. Çirkli su, sanitariya çatışmazlığı və qidalanma problemləri bu xəstəliklərin geniş yayılmasına gətirib çıxarır. UNICEF məlumatına əsasən, hər il yüz minlərlə uşaq sadə rehidratasiya müalicəsi almadığı üçün ishaldan həyatını itirir.
Bundan başqa, malyariya xüsusilə Afrika və tropik regionlarda yaşayan uşaqlar üçün ciddi təhlükə olaraq qalır. Statistikaya görə, malyariyadan ölənlərin böyük hissəsini məhz 5 yaşdan kiçik uşaqlar təşkil edir.

Bildirilir ki, uşaq ölümlərinin əksəriyyəti qarşısı alına bilən səbəblərlə bağlıdır. Peyvəndlərin genişləndirilməsi, təmiz içməli suya çıxış, sanitariya şəraitinin yaxşılaşdırılması və ilkin tibbi xidmətlərin gücləndirilməsi minlərlə uşağın həyatını xilas edə bilər.

Fidan Hacızadə
Sfera.az

Bu adi xəstəliklər uşaqların həyatına son qoyur - UNICEF