Blinken İsrail müxalifətinin liderləri ilə GÖRÜŞDÜ

ABŞ dövlət katibi Entoni Blinken İsrail müxalifətinin liderləri ilə görüşüb.

Sfera.az "Times of Israel"ə istinadən xəbər verir ki, İsraildə səfərdə olan ABŞ dövlət katibi Təl-Əvivdə Benni Qantz və Yair Lapidlə görüşlər keçirib.

Benni Qantz "X" hesabında görüşlə bağlı paylaşım edərək bildirib ki, görüş bu gün baş tutub.

O, Blinkeni HAMAS-ın saxladığı israilli girovların azad edilməsi ilə bağlı razılığa gəlmək üçün danışıqlardakı vasitəçilərə “maksimum təzyiq” tətbiq etməyə çağırıb və "hökumətdən kənarda bu məsələ ilə bağlı istənilən məsuliyyətli tənzimləməni dəstəkləyəcəyini deyib: "Girovların geri qaytarılmasına səbəb olacaq istənilən məsuliyyətli planı, hətta hökumətdən kənarda da dəstəkləyəcəm.

Mən həmçinin dövlət katibi Blinkenə bildirdim ki, ABŞ bütün beynəlxalq ictimaiyyətlə birlikdə şimal sərhədində "Hizbullah"ın yaratdığı təhlükənin aradan qaldırılmasında mərkəzi rola malikdir və vurğuladım ki, dünya bunu edə bilməsə, İsrail dövləti şimal sakinlərini qorumaq və onların evlərinə təhlükəsiz qayıtmasını təmin etmək üçün qətiyyətlə hərəkət etməkdən çəkinməyəcək", - o paylaşımında qeyd edib.

Xatırladaq ki, İsraildə səfərdə olan Entoni Blinken bu gün həmçinin Prezident İsaak Herzoqla, dünən isə Baş nazir Benyamin Netanyahu və müdafiə naziri Yoav Qallant ilə görüşüb.